Улс төр

Францын ерөнхийлөгч Эммануэль Макрон, Италид шинээр эмхлэн байгуулагдсан засгийн газрыг улиран тэргүүлж байгаа Италийн хамтрагч, ерөнхий сайд Жузеппе Конте-тай уулзахаар Ромыг зорьжээ. Макроны энэ айлчлалын гол зорилго нь Парис, Ромын харилцааг шинэ түвшинд гаргаж, өмнөх үл ойлголцлоо шийдэн, хоёр улсын найрсаг харилцааг сэргээх явдал байжээ.

Итали болон Францын харилцаа холбоо сүүлийн үед ихээхэн асуудалтай тулгарч, харилцааны хүнд цаг үеээ туулж байгаа юм. Тэгвэл Францын тэргүүн Италийг зорьж, энэ улсын засгийн газрын тэргүүнээр улиран сонгогдсон хамтрагчтайгаа хоёр улсын харилцааны талаар хэлэлцэхээр хүрэлцэн ирсэн байна. Хоёр улсын төр засгийн тэргүүнүүд Ромд хийж байгаа уулзалтынхаа үеэр хоёр улсын харилцаанд саад тотгор учруулаад байгаа хууль бус дүрвэгсдийн асуудлыг голчлон хэлэлцэж байгаа юм.

 

Францын тэргүүн уулзалтын эхэнд одоо мөрдөгдөж байгаа цагаачлалын хууль, дүрвэгсдийг хүлээн авах механизм улс орнуудын харилцаанд таагүй нөлөө үзүүлж, амьдрал дээр төдийлөн сайнаар хэрэгжихгүй байгаатай санал нэгджээ. Эммануэль Макрон энэ талаар мэдэгдэхдээ:- Харамсалтай нь ЕХ дүрвэгсдийн асуудлаарх байр сууриа ачааны хүндийг үүрч байгаа улс орнууд, тухайлбал Италийн хувьд төдийлөн нэгдмэл байж, дэмжих талаас нь шийдэж чадаагүй. Франц улс цаашид энэ чиглэлд хамтран ажиллаж, Дублины гэрээний зүйл заалтыг дахин шинэчлэхэд нөлөө үзүүлж, цаашдаа бүгдэд эрх тэгш үйлчлэх зөв гарц шийдэлд хүрч ажиллах зорилт тавиад байна гэжээ. 

 

Италийн ерөнхий сайд Жузеппе Конте Францын хамтрагчийнхаа илэрхийлж байгаа байр сууринд талархалтай хандаж, ЕХ-ны улс орнуудын хувьд цагаачлал, хууль бус дүрвэгсдийн асуудал шүдний өвчин болоод байгаа нь үнэн. Гэвч энэ асуудал дээр Европын орнууд адил тэгш эрх үүрэг хүлээхгүй байгаа нь улс орнуудыг талцуулаад байгаа нь үнэн. Тиймээс бид өмнөө тулгамдаад байгаа асуудлаа эв зүйгээр, цаг алдалгүй шийдэх нь чухал гэжээ.

 

Ром хотноо хүрэлцэн ирсэн Францын тэргүүнтэй түүнчлэн Италийн ерөнхийлөгч Сержо Маттарелла мөн уулзжээ. Талууд уулзалтынхаа үеэр ЕХ-ны эдийн засгийн байр байдал, мөн цаг уурын өөрчлөлттэй холбоотой сэдвээр хэлэлцжээ.