Үйл явдал

Саудын Арабын батлан хамгаалах яам улсынх нь нефтийн объектуудын эсрэг халдлага үйлдэхэд ашигласан дрон болон пуужингийн сэг үлдэгдлийг олон нийтэд дэлгэн үзүүлжээ. Чухам эдгээр нисэгчгүй төхөөрөмж, дроны тусламжтайгээр Йемений тал Саудын Арабын нефтийн байгууламжууд руу халдсан байна.

Энэ сарын 14-нд Саудын Арабын Үндэсний хэмжээний Aрамко нефтийн компанийн Абкайк болон Хураист байрлах нефтийн байгууламжууд халдлагад өртсөн юм. Нефтийн байгууламжууд үл мэдэгдэх дроны халдлагад өртсөнөөс үйл ажиллагаа нь доголдож, бүрэн хүчин чадлаараа олборлолт явуулах аргагүй болжээ. Үүний улмаас Саудын Арабын нефтийн олборлолт хоногт 5 сая баррелиар буурсан байна. Халдлагын улмаас Абкайк болон Хураис дахь нефтийн байгууламжуудад гал гарсан юм. Халдлагыг нисэгчгүй 10-аад дрон ашиглан үйлдсэн байна. Дрон ашиглан үйлдсэн халдлагын хариуцлагыг сүүлд Йемений хуситууд хүлээсэн юм. Тэгвэл Йемений талаас үйлдсэн халдлагад ашигласан дронуудыг Саудын Арабын батлан хамгаалах яам олонд дэлгэн үзүүлжээ. Яамны албаны хүний мэдэгдсэнээр хэдийгээр халдлагын хариуцлагыг Йемены хуситууд өөртөө хүлээсэн ч үнэн хэрэгтээ халдлагыг Ираны дрон ашиглан үйлдсэн байж болохыг үгүйсгэхгүй байгаа юм. Саудын Арабын батлан хамгаалахын яамны албаны төлөөлөгч Турки аль Маликигийн мэдээлснээр Иран улсын зүгээс улс орных нь эсрэг дайсагнасан байр суурь баримталж, Тегеран Йемений хуситын бүлэглэлийг дэмжиж байгаа нь илэрхий байгаагаас үүдэн дээрх халдлагад Ираны талыг хардах бүхий л үндэслэл байгаа гэжээ.

Йемений хуситын бүлэг Саудын Араб тэргүүтэй олон улсын эвслийн эсрэг тэмцэж байгаа юм. Саудын Арабын тэргүүлж байгаа олон улсын цэргийн эвсэл сүүлийн хэдэн жилийн туршид Йеменийг Ираны удирдлаган дор хяналтандаа оруулахаар тэмцэж байгаа нутгийн хуситуудын эсрэг тэмцэж байгаа юм.