НАСА, Ангараг гариг дээр perseverance хөлгөө амжилттай буулгалаа

Америкийн НАСА агентлаг Марс буюу Ангараг гариг дээр Perseverance хөлгөө амжилттай буулгасан талаар мэдээлжээ. Сансрын хөлөг Улаан гариг дээр бууж байгаа үйл явцыг НАСА-гийн албаны сайтан дээр шууд дамжуулан үзүүлсэн байна.

Сансрын аппарат Улаан нүдэн гаригийн гадаргуу дээр Йезеро кратер буюу тогоонд  буужээ. Ийнхүү амжилттай буусныхаа дараа сансрын аппарат дэлхий рүү Ангараг гаригийн анхны зургаа илгээсэн байна. Америкийн сансрын аппарат Ангараг гарагийн Йезеро тогооны орчимд буух ажиллагаа автомат горимонд явагджээ. Нийтдээ буух үйл явц 7 минутын туршид үргэлжилсэн байна. Ангараг гариг дээр бууснаар сансрын аппарат судалгаа шинжилгээний ажлаа эхлүүлэн, Улаан гаригийн хөрсний зураг сэлт дэлхий рүү илгээснээс гадна мөн энэ гариг дээр амьдрал байсан эсэхийг судлах ажилдаа орж, ул мөр хайх ажлаа эхлүүлжээ.

Perseverance сансрын хөлгийг 2020 оны 7-р сард Атлас V пуужин зөөгч хөлгийн тусламжтай сансарт хөөргөсөн юм. Өнгөрсөн хугацаанд сансрын аппарат Улаан гаригийг чиглэн ниссээр ийнхүү зорьсон газраа хүрсэн байна.