Монголбанкны валютын албан ханш:      USD - ?     EUR - ?     GBP - ?     RUB - ?     CNY - ?     KRW - ?    

Дархан аварга Б. Бат-Эрдэнэ, "Гацуурт"-ын Л. Чинбат нар "Их-Эе"-ийн талаар мэдээлэл хийлээ

  Ч.Доржбат 2019-02-19 1002

МҮБХ-ны удирдлагын түвшинд гарсан маргааны улмаас Монгол бөхийн өргөө 2018 оны 4-р сараас хойш удаа дараа хаагдаж, цагдаагийн хамгаалалтад байсан билээ. Харин саяхан маргалдагч талууд эвлэлдэн нэгдэж, Ойлголцлын санамж бичигт гарын үсэг зурж, хоёр талаас дахин ямар нэгэн үймээн, самуун гаргахгүй, Монгол бөхийн өргөө рүү дайрахгүй гэсэн албан хүсэлт Цагдаагийн байгууллагад гаргаснаар Монгол бөхийн өргөөг нээж, үйл ажиллагаа нь хэвийн горимдоо орсон юм.

Уг ойлголцлын санамж бичигт талуудыг төлөөлөн дархан аварга Х. Баянмөнх, Б.Бат-Эрдэнэ, Гацуурт ХХК-ийн захирал Л. Чинбат нар гарын үсэг зурж, улмаар хоёр тал нэгдэн МҮБХ-ны ээлжит 5-р Их эеийг зохион байгуулах ажлыг хэсэг байгуулжээ. Тус ажлын хэсэг нь хоёр талаас тэгш тооны төлөөлөл орсон 12 хүний бүрэлдэхүүнтэй бөгөөд дархан аварга Х.Баянмөнх, Б.Бат-Эрдэнэ нар ахалж, дотроо "Их эед төлөөлөгч сонгох журам боловсруулах, МҮБХ-ны дүрмийн төсөл, тайлан бэлдэх" гэсэн 3 дэд хэсэг байгуулан идэвхтэй ажиллаж байна.

Энэхүү ажлын хэсгээс Ээлжит 5-р их эеийг 2019 оны 2-р сарын 20-ны өдөр зохион байгуулахаар товлосон байсан боловч ажлын хэсгийн нэг ахлагч дархан аварга Х.Баянмөнх хүндэтгэн үзэх шалтгааны улмаас (гадаад улс руу сувилалд явсан) эзгүй байгаа тул ээлжит 5-р Их эеийг хэсэг хугацаанд хойшилж байгаа тухай өчигдөр дархан аварга Б.Бат-Эрдэнэ, “Гацуурт” ХХК-ны захирал Л.Чинбат нар мэдээллээ.

Хэдийгээр их эеийн тов хойшилсон ч хоёр тал харилцан зөвшилцсөний үндсэн дээр Монгол бөхийн өргөөний үйл ажиллагаа хэвийн үргэлжлэх, гүйцэтгэх захирал, улсын заан Б.Сайнбаярын удирдлага дор МҮБХ-ны хуучин ажлын алба хурал хуралдтал өдөр тутмын үүрэгт ажлууд болон бөхийн барилдаан, урлагийн тоглолт, бусад үйл ажиллагаагаа хуваарийн дагуу зохион байгуулан ажиллахаар болжээ. Үүний дагуу ойрын өдрүүдэд Монгол бөхийн өргөөнд аймгуудын золголт, шашин номын хурал, тоглолтууд хуваарийн дагуу зохион байгуулагдаж байгаа бөгөөд шаргачин гахай жилийн эхний барилдаан 3-р сарын 01-нд Монгол бөхийн өргөөнд болохоор товлогдоод байна.

 

Улс төр
  
Нийгэм
  
Эдийн засаг
  
Дэлхий
  
Шар
  
Спорт
  
Соёл урлаг
  
Энтертайнмент
  
Эрүүл мэнд
  
Зөвлөгөө