Ковид-19

Манай улсад сэжигтэй болон онош батлагдсан тохиолдол бүртгэгдээгүй гэдгийг ЭМЯ-наас мэдээллээ. ХӨСҮТ болон Дархан-Уул аймаг дахь лабораториудад нийт 315 хүнийг шинжилгээнд хамруулж, онош үгүйсгэсэн байна. Мөн маргааш Сөүл-Улаанбаатар чиглэлийн тусгай нислэгээр 270 гаруй иргэнээ татан авах ажлыг зохион байгуулна. Үүнтэй холбоотойгоор бэлэн байдлаа ханган ажилласан гэдгийг хэллээ.   

ХӨСҮТ-т тусгаарлагдсан 122, Цэргийн төв эмнэлэгт тусгаарлагдсан хоёр, ажиглах байранд байгаа 25 хүний давтан шинжилгээний хариу өнөөдөр гарлаа. Эдгээр иргэдээс коронавируст халдвар илрээгүй байна. Үүнээс гадна Дорноговь аймаг, Замын-Үүд суманд тусгаарлагдсан зургаа, тандалтын зорилгоор 110 хүнийг шинжилгээнд хамруулахад хариу мөн сөрөг гарчээ.  Сэлэнгэ аймаг, Алтанбулаг боомтоор орж ирсэн иргэдийг шинжилгээнд хамруулж, ажиглах үүднээс Дархан-Уул аймагт лаборатори нээсэн. Тус лабораторид өчигдөр нийт 59 хүнийг шинжилгээнд хамруулж оношийг үгүйсгэжээ.

Тусгаарлах байранд байгаа иргэдийг 21 хоногийн хугацаанд ажиглалтад байлгаж, үүний дараа нь гэрт нь шилжүүлж байгаа юм. Өчигдөр тусгаарлах хоног дууссан 80 иргэнийг ХӨСҮТ-өөс шилжүүлсэн байна. Мөн маргааш Сөүл-Улаанбаатар чиглэлийн тусгай үүргийн онгоцоор 270 гаруй иргэн ирнэ. Эдгээр иргэдийг хүлээн авах, тусгаарлах байруудыг бэлтгэж, бэлэн байдлыг ханган ажиллаж байна. Тухайлбал эрсдэлтэй зорчигчдыг хүлээн авах үүднээс ХӨСҮТ-д нийт 150 орыг бэлджээ.

Ковид-19 коронавируст халдвараас урьдчилан сэргийлэх чиглэлээр иргэдэд зөвлөгөө, мэдээлэл өгөх зорилгоор 119 тусгай дугаарыг утсыг нээн ажиллуулж байгаа. Энэхүү утсанд өчигдөр нийт 200 дуудлага мэдээлэл иржээ. Мөн онош батлагдсан гадны улсад амьдарч байгаа манай улсын таван иргэн холбогдон бусдад халдвар тараахгүй байх үүднээс ямар арга хэмжээ авах, эрүүл зөв хооллолтын талаар зөвлөгөө авсан байна. Үүнээс гадна АНУ-аас хоёр, Шведээс мөн хоёр хүн холбогдон мэдээлэл авчээ. 

ФЭЙСБҮҮК ШУУД ҮЗЭХ