Ковид-19

Дэлхийн хэмжээнд ковид-19 халдварын эсрэг вакцин гарган авахад бүх анхаарлаа хандуулан ажиллаж байна. Харин БНХАУ-д вакцин гарган авахад анхааран ажиллаж байгаагаас гадна уламжлалт эмийн ургамал, тан ашиглан халдвартай тэмцэж байгаа юм. Хятад Улсын Засгийн газраас коронавирусийг эмчлэхэд уламжлалт эмчилгээний аргаар халдвартай иргэдийн 92 хувийг эмчилсэн гэдгийг мэдээлсэн байна.

Хятадын уламжлалт эмчилгээ нь 3,500 орчим жилийн өмнөөс ашиглагдсан ургамлын гаралтай эм, зүүний эмчилгээ, аяган эмчилгээ, гуа ша, массаж, яс үе мөчинд сайн дасгал, хоолны дэглэмийн гэх мэт янз бүрийн арга дээр суурилсан байдаг. Дэлхийн хамгийн анхны анагаах ухааны аргуудын нэг гэдгээрээ алдартай. Үеэс үед Хятад Улсын иргэд уламжлалт эмчилгээ хийлгэн эерэг үр дүн үзүүлдэг ч энэ аргыг эсэргүүцэж байгаа маргаан гарах нь ч бий.

Шинжээчид Хятад Улсын энэ арга барил нь олон оронд түгээхэд зүйтэй эсэх дээр эргэлзэж байгаа тухай эх сурвалжид дурдсан байна. Энэ улсын эрүүл мэндийн комисс нь коронавируст халдварын эмчилгээнд тусгай уламжлалт аргыг ашиглаж байгаа бөгөөд 2003 онд дэгдсэн САРС халдварын үед уламжлалт эмчилгээ мөн л үр дүнгээ өгч байв.

Тодруулбал зургаан төрлийн уламжлалт эмийг коронавирусний халдварт хэрэглэж байгаа юм байна. Тэр дундаас “Лианхуа Чингвэн” гэх 13 төрлийн ургамлыг багтаасан эмийг илүү өргөн хэрэглэж байна. 2009 онд дэгдсэн H1N1 халдварын үед гарган авсан “родиола сарнай”, “жинхуа чингган” гэх эмүүдийг коронавирусний эмчилгээнд ашиглаж байгаа юм. Энэ хоёр эм нь зөгийн бал, гаа, ликёр гэх мэт 12 төрлийн ургамлыг багтаасан. Уламжлалт эмийг гарган авсан шинжээчдийн зүгээс эдгээр эм нь коронавирусний эмчилгээнд сөрөг нөлөө байхгүй гэсэн боловч зарим шинжээчид шинжлэх ухааны нарийн шинжилгээ хийн ашиглах нь зүйтэй гэж үзжээ.

АНУ-ын Үндэсний эрүүл мэндийн хүрээлэнгийн зүгээс эдгээр эм нь халдварын шинж тэмдгийг дарахад тустай ч, вирусийг бүрэн эмчлэхэд тийм ч эерэг нөлөөтэй биш гэдгийг хэлсэн байна. Үүнээс гадна их Британийн эмийн судалгааны ахмад ажилтан Эдзард Эрнст Хятадын уламжлалт эмүүдийн тухай “Уламжлалт эмүүдийг үр дүнгийн тухай ямар ч баримт байхгүй учраас өвчтөнд ашиглах нь аюултай” гэж “Nature Journal” сэтгүүлд мэдээлж байжээ. Ямартай ч Хятадын уламжлалт анагаахын эм бэлдмэл, танг хэрэглэх улс орны тоо нэмэгдсээр байгаа юм. Гадаад харилцааны зөвлөлийн дэлхийн эрүүл мэндийн асуудал хариуцсан ахлах мэргэжилтэн Янжонг Хуан “Эмчилгээнд уламжлалт аргыг хэрэглэх ч, орчин цагийн эм бэлдмэлийг түлхүү хэрэглэх нь хамгийн зөв сонголт” хэмээн мэдэгдэж байв.