Ковид-19

Хонконг Засаг захиргааны бүсэд бараг гурван долоо хоног орчим дотоодын коронавируст халдварын тохиолдол илрээгүй байсан. Харамсалтай нь энэ сарын 6-ны өдөр дахин дотоодын халдварын тохиолдол бүртгэгдэж эхэлсэн. Халдварын тохиолдол гэнэт нэмэгдэх хандлагатай болсон тухай Хонконгийн эрх баригчид иргэддээ анхааруулга хийж байна.

Өчигдөр гэхэд Хонконгт дотоодоос 19 иргэн халдвар авсан нь илэрсэн байна. Гаднаас зөөвөрлөгдөн ирсэн таван тохиолдол нэмэгдсэнээр, нийт халдварын батлагдсан тохиолдол 1,324 болсон байна. Хонконгийн халдварт өвчин судлалын хүрээлэнгийн тэргүүн Чуан Шу Куан одоо байгаа нөхцөл байдлыг тайлбарлахдаа

“Энэ нөхцөл байдал нэлээдгүй ярвигтай байна”

гэж хэлсэн байна. Учир нь гэнэт шинээр халдвар тархах болсон шалтгаан, чухам хаанаас халдварласан эсэх нь яг тодорхойгүй байгаа учраас, энэ коронавируст халдвар нь их ойлгомжгүй маш аюултай юм гэж хэлсэн байна. 7-р сарын 6-нд гэнэт дотоодоос халдвар илэрсэн иргэний нэг нь хоолны газарт ажилладаг. Тухайн хоолны газар нь яргай загасыг хүнсэндээ ашигладаг сүшиний газар юм. Энэ хоолны газраас халдвар авсан 14 настай хүүхэд халдвартайгаа мэдэлгүй хичээлдээ явсан учраас Вонг Тай Син дүүрэг дэх тухайн сургуулийг нь хаасан байна.

Үүнээс гадна хаанаас халдвар авсан нь тодорхойгүй 5 иргэн байгаа. Хонконгийн амьсгалын замын халдварт өвчин судлаач доктор Дэвид Хуйгийн таамаглаж байгаагаар,

“Магадгүй тусгаарлалтад 14 хоноход халдвар илрээгүй, ямар нэгэн шинэ тэмдэггүй иргэнээс бусад хүн халдвар авсан байх магадлалтай”

гэж мэдээлж байсан. Зарим халдварын тохиолдол нь тухайн хүний биед вирус халдсан ч, өөрт зовиургүй шинж тэмдэггүйгээр дархлаагаар вирусийг дарж байгаа ч, бусдад тараах магадлалтай тухай зарим холбогдох албаны шинжээчид хэлж байсан юм.