Ковид-19

ОХУ-д өчигдөр 5118 тохиолдол шинээр бүртгэгдэж, өвчилсөн хүний тоо 890 мянгад хүрлээ. Олон улсын байгууллагаас халдварын хоёр дахь давалгаа 10-р сард эхэлнэ. Тиймээс ОХУ-ыг эрсдэлд бэлэн байх, хариу арга хэмжээний төлөвлөгөөгөө боловсруулахыг зөвлөжээ. Харин дэлхийн дахинд халдвар авсан хүний тоо 253 мянгаар нэмэгдсэн байна. Дэлхийн улс орнууд цар тахалтай хэрхэн тэмцэж байгаа талаарх мэдээллээс хүргэе.

Халдвар авсан хүний тоо 253 мянган нэмэгдэж нийт өвчилсөн хүний тоо дэлхий дахинд 20 саяд /20,014,574/ хүрлээ. Мөн 5000 гаруй хүн нас барж, цар тахлын улмаас нас барсан хүний тоо 734,755 болсон байна.

ХАЛДВАР АВСАН ХҮНИЙ ТОО 20 САЯД ХҮРЛЭЭ

Өвчилсөн хүний тоогоор эхэнд эрэмбэлэгдэж байгаа АНУ-д өчигдөр 48 мянган хүний хариу эерэг буюу халдвартай гэж гарчээ. Нийт тохиолдлын тоо 5,089,416 хүрсэн бол 163,425 хүн цар тахлын улмаас амиа алджээ.

Бразилд 22 мянган хүн нэмж өвчилж, халдвар авсан хүний тоо 3,057,470 хүрлээ. Мөн 101,752 хүн эндсэн байна.

Энэтхэг улсад халдвар эрчимтэй тархсан хэвээр байна. Даваа гарагт 53 хүн нэмж өвчилж, нийт тохиолдлын тоо 2,215,074-т хүрсэн байна. Мөн 44,386 хүн нас баржээ.

ОХУ-д 5118 тохиолдол шинээр бүртгэгдэж тохиолдлын тоо 890,799-т хүрсэн бол 14,973 хүн цар тахлын улмаас амь насаа алджээ.

ГУРАВ ХОНОГИЙН ДОТОР НЭГ САЯ ХҮН КОРОНАВИРУСТ ХАЛДВАРААР ӨВЧИЛЖ БАЙНА

Халдвар анх дэгдэж байхад нэг сарын дотор нэг сая тохиолдлоор нэмэгдлээ гэж ДЭМБ-аас мэдээлж байсан. Харин өнөөдөр нөхцөл байдал өөрчлөгдөж ердөө 3 хоногийн нэг сая хүн нэмж өвчилж байгаа бөгөөд дээрх тоо баримт халдвар эрчимтэй нэмэгдэж байгааг харуулж байгаа юм. Гэсэнч  ДЭМБ-аас итгэл найдвараа алдаж болохгүй гэдгийг дахин санууллаа. Мөн улс орнуудын засгийн газраас хариу арга хэмжээний тактикаа зөв боловсруулан цар тахалтай тэмцэх, хамгийн чухал нь иргэд амьдралын шинэ хэв маягт суралцан, эрүүл мэндийн байгууллагаас өгч байгаа зөвлөмжийг дагах хэрэгтэйг гэсэн юм. Үүнээс гадна улс орнууд эдийн засгаа сэргээх үүднээс үйлчилгээний байгууллагуудаа нээх арга хэмжээ авч байгаа. Гэхдээ халдвар хамгааллын нарийн дэг журмыг мөрдөх ёстой гэсэн байна. Ялангуяа сургуулийн үйл ажиллагааг эхлүүлэхдээ болгоомжтой хандах, зөвхөн багш нар бус эцэг эхчүүдийн үүрэг оролцоог нэмэгдүүлэх хэрэгтэй гэлээ.

ЯПОН УЛСАД 839 ТОХИОЛДОЛ ШИНЭЭР БҮРТГЭГДЖЭЭ

Азийн зарим улс орны мэдээллээс хүргэе. БНХАУ-д 115 тохиолдол шинээр бүртгэгджээ. Үүний 31 гаднаас зөөвөрлөгдсөн тохиолдол байсан байна. Харин Япон Улсад 839 тохиолдол шинээр бүртгэгдэж халдвар авсан хүний тоо 49 мянгад хүрсэн байна. Мөн цар тахлын улмаас 5 хүн энджээ. Тус улсад халдварын тоо болон эмнэлэгт хандах өвчтний тоо нэмэгдэх болсон. Тиймээс зарим газруудад хөл хорионы дэглэм дахин тогтоож эхэлсэн.

ИХЭВЧЛЭН ОЛОН НИЙТИЙН ГАЗАР БОЛОН ГЭР БҮЛИЙН ОРЧИНД ХАЛДВАР ТАРХАЖ БАЙНА

Халдвар ихэвчлэн хаанаас эхэлж хүн амын дунд тархаж байгааг тогтоохоор олон улсын байгууллагаас 13 улс орны 108 голомтот бүсэд нийт 65 удаагийн судалгаа хийжээ. Ингэхэд гэр бүлийн орчин болон, олон нийт цугласан газраас халдвар дамжиж байгаа нь тогтоогджээ. Тиймээс олон нийтийн газар явахдаа зайлшгүй амны хаалт зүүх хэрэгтэй гэдгийг эрүүл мэндийн байгууллагаас зөвлөлөө.