Эрүүл мэнд

Монголын эмч нарын 6-р их хурал төрийн ордонд эхэллээ. Салбарын хөгжил, тулгамдаж буй асуудлуудын талаар ярилцаж гарц шийдлээ олохоор цугласан байна. Эмч нарын их хурал сүүлийн 10 гаруй жил бололгүй мартагджээ. Тэгвэл энэ жилээс дахин сэргэж бусдын эрүүл мэндийн төлөө зүтгэж буй цагаан халатангууд өөрсдийн дуу хоолойгоо төр засагтаа хүргэлээ. Өнөөдөр монгол улсын 3.2 сая хүн амд 11 мянга гаруй эмч сувилагч эрүүл мэндийн тусламж үйлчилгээ үзүүлэн ажиллаж байна.

Монгол орны өнцөг булан бүрээс эмч сувилагч, эмнэлгийн мэргэжилтэн эрүүл мэндийн ажилтнууд гээд 800 гаруй төлөөлөл эмч нарын зургаадугаар их хуралд оролцсон юм. Арван жилийн дараа болж байгаа их хурлаар эрүүл мэндийн салбарын ололт амжилт, тулгамдаж байгаа асуудал, цаашид хийж хэрэгжүүлэх ажлын талаар зөвлөлдлөө. Сүүлийн жилүүдэд эх нярайн эндэгдлийг бууруулахаас гадна 0-5 насны хүүхдийн эндэгдлийн гол шалтгаан болж байгаа уушигны хатгалгаа өвчнийг 46 хувиар бууруулжээ. Мөн 2018 оноос хойш хэрэгжүүлсэн эрүүл шүд эрүүл хүүхэд аяны хүрээнд 90 гаруй мянган хүүхдийг эмчилгээнд хамруулсан байна. Харин хүн амын дунд зүрх судасны өвчлөл, чихрийн шижин нэмэгдэж байгаад салбар яам анхаарал хандуулахаас гадна сүрьеэгийн өвчлөлд онцгой анхаарч байгааг салбарын сайд хурлын илтгэлдээ дурдлаа.

Өнөөдрийн байдлаар улсын хэмжээнд 4343 эрүүл мэндийн байгууллага үйл ажиллагаа явуулж 11169 эмч 50274 ажилтан ажиллаж байна. Хүн амд эрүүл мэндийн тусламж үйлчилгээ  үзүүлэхэд техник тоног төхөөрөмжийн асуудал хамгаас чухлыг зургадугаар их хуралд оролцсон төлөөлөгчид онцолж байсан юм. Тиймдээ ч тоног төхөөрөмжийн шинэчлэлд засгийн газраас онцгой анхаарч өмнөх оноос хоёр дахин их төсвийг энд онд зарцуулжээ. Үүний дүнд алслагдсан аймгуудад тоног төхөөрөмжийн шинэчлэл эрс сайжирсныг хэлж байна.

Салбар яамнаас эмч мэргэжилтнүүдийг дэмжих чиглэлд мэргэжлээрээ 25 жилээс дээш тасралтгүй ажилласан эмч мэргэжилтнүүдэд зөвлөх зэрэг олгох, 25-аас доошгүй жил ажилласан эмчид мэргэжилтнүүдэд үйл ажиллагаа эрхлэх зөвшөөрөл шууд олгох, багийн эмч нарыг 3 жил тутамд сургалтад хамруулах зэрэг олон арга хэмжээ авахаар болжээ. Харин цалин хөлс, нийгмийн асуудалд дараах байдлаар анхаарна гэлээ.

Монголын эмч нарын зургаадугаар их хурал Төрийн ордонд хоёр өдөр үргэлжилнэ. Өнөөдөр ажлын амжилт гаргаж салбартаа манлайлсан 12 ажилтанд эрүүлийг хамгаалах тэргүүний ажилтан цол тэмдэг гардууллаа. 

 

 

 

 

ФЭЙСБҮҮК ШУУД