Эрүүл мэнд

Хятадад COVID-19-ийн халдвар авч карантинд орсон хүмүүсийг байлгаж байсан барилга нурсан золгүй явдал энэ амралтын өдөр болсон. Хятадын Цюаньжоу тойргийн Личэн дүүрэгт хөл хорионд авсан хүмүүсийг байлгаж байсан зочид буудлын барилга нурсан юм. 

Хамгийн сүүлд авсан мэдээллээр аврагчид нурсан барилгын нурангин доороос 49 хүнийг гаргажээ. Нийтдээ барилга нурах үед барилгад 70 гаруй хүн байсан гэж тооцож байгаа юм. Зочид буудлын барилга нь 2013 онд ашиглалтанд орсон, 6 давхар барилга байжээ. 

Вьетнам улсад энэ амралтын өдрүүдэд COVID-19 шинэ коронавирусын 9 шинэ тохиолдол нэмж бүртгэгдсэн байна. Ингэснээр нийт халдвар авсан хүний тоо 30-д хүрчээ. Вьетнамын эрүүл мэндийн яамнаас мэдээлж байгаагаар сүүлд нэмж бүртгэгдсэн тохиолдлууд нь 3-р сарын 2-нд Лондон-Ханой чиглэлийн агаарын нислэгээр эх орондоо эргэн ирсэн хүмүүсээс илэрсэн байна. Энэхүү нислэгээр Вьетнамд ирж саатуулагдсан хүмүүсийн 7 нь Их Британийн иргэн, үлдсэн 2 нь Мексик болон Исландын иргэд байгаа юм. Тэднийг тусгаарлан эмчилж байна. 

Катар улс 3-р сарын 9-ний байдлаар нэмэлтээр дэлхийн 14 улс орноос ямар ч төрлийн зорчигч хүлээн авахгүй байх захирамж гарган мөрдөж байна. Энэ нь бүх талын тээврийн хэрэгслүүдийг хамарч байгаа юм. Саудын Арабын Вант улс вирусын тархалтыг тогтоон барих зорилгоор Арабын Нэгдсэн Эмират, Кувейт, Бахрейн, Ливан, Сири, Өмнөд Солонгос, Египт, Итали зэрэг улс орноос улсынхаа хил рүү агаараар болон далайн тээврээр ирэх зорчигсдыг хүлээн авахаар татгалзаж, хориг тавиад байна.