Улсын Их хурал

Чуулганы нэгдсэн хуралдаанаар зарим улсад суугаа элчин сайдыг эгүүлэн татах , томилох талаар Монгол улсын ерөнхийлөгчөөс ирүүлсэн саналыг зөвшилцөх тухай асуудлыг хэлэлцлээ.  ОХУ, Бүгд найрамдах Куба, Польш, Швед, Тайландын хаант улсад суух Онц бөгөөд бүрэн эрхэт элчин сайд нарыг томиллоо. Элчин сайдад нэр дэвшигчид мэргэжил, мэдлэг боловсрол, ажлын туршлага чадварын хувьд хуульд заасан бүхий л шалгуур шаардлагыг бүрэн хангасан гэж үзжээ. 

Олон сарын хугацаанд гацаад байсан элчин сайдуудыг чөлөөлөх томилох асуудлыг өнөөдрийг чуулганы хуралдаанаар эцэслэн шийдлээ. 5 улсад суух элчин сайдууд болон НҮБ-ын дэргэдэх байнгын төлөөлөгчийг албан ёсоор томиллоо. Одоогоор 20 орчим улсын элчин сайдыг шинээр томилох шаардлагатай байгаа. Гэвч засгийн газраас өргөн барьсан нэрсийг ерөнхийлөгч дээр гацаад байсан. Харин өнөөдрийн 6 хүн нь ерөнхийлөгчийн дэмжлэгийг авсан хүмүүс гэсэн үг.

Тухайлбал ОХУ-д суух элчин сайдаар зэвсэгт хүчний жанжин штабын дарга асан Д.Давааг томиллоо. Мөн Монгол Улсаас Индонез улсад элчин сайдаар сууж байсан Ш.Батцэцэг Куба улсад суух элчин сайдаар томилсон бол, ГХЯ-ны Бодлого төлөвлөлтийн газрын дэд захирлаар ажиллаж байгаа Б.Доржийг Польш руу томилохоор боллоо. Мөн ГХЯ-ны Олон улсын гэрээ, эрх зүйн газрын захирлаар ажиллаж байгаа Төмөрийг Тайландад суух элчин сайдаар томилж байна. Тэрээр үндсэн хуулийн цэцийн дарга асан Амарсанаагийн хүү билээ. Мөн 2015 оноос ГХЯ-ны Хөрш орнуудын газрын захирлаар ажиллаж байгаа Т.Жанабазарыг шведэд суух элчин сайдаар томилсон. Харин НҮБ-ын дэргэдэх байнгын төлөөлөгчөөр томилогдсон В.Энхболд ГХЯ-ны Гадаад худалдаа, эдийн засгийн хамтын ажиллагааны газрын захирлаар 2016 оноос хойш ажиллаж байгаа юм. Товчхондоо Даваа генералаас бусад нь дипломатч мэргэжилтэй, туршлагатай хүмүүс гэсэн үг.

БНХАУ, БНСУ, ЯПОН УЛС ДАХЬ ЭЛЧИН САЙДУУДЫГ ЯАРАЛТАЙ ТОМИЛОХ ШААРДЛАГАТАЙ БАЙНА

Харин одоо үлдсэн элчин сайдуудын нэрийг хэзээ оруулж ирэх вэ гэдэг асуулт үлдэж байна. Монгол улстай ойр дотно харилцааны БНХАУ, Япон, Өмнөд Солонгос зэрэг улсуудад томилох элчин сайдуудыг яаралтай оруулж ирэх шаардлагатай байгааг гишүүд сануулж байв.

Шинээр томилогдож байгаа элчин сайд нарыг хууль бус наймаанаас хол байж Монгол улсын нэр хүндийг өндөр өргөж явахыг сануулсан. Мөн тухайн улсад ажиллаж амьдарч байгаа Монгол иргэдийнхээ төлөө ажиллах ёстойг анхаарууллаа. Хэрэв иргэдийнхээ асуудлыг анхаардаггүй элчин сайд байвал Гадаад харилцааны сайд хатуу хариуцлага тооцохоо мэдэгдлээ.

Манай улс 196 улстай дипломат харилцаа тогтоожээ. Түүнээс одоогоор 32 улсад Элчин сайдын яам 14-т нь Ерөнхий Консулын газар ажиллаж байна.