Засгийн газар

Монгол Улсын 31 дэх Ерөнхий сайдын тэргүүлэх засгийн газар эдийн засгийн хүнд сорилттой тулгарна гэдгийг мэргэжлийн хүмүүс хэлж байгаа. Учир нь дэлхий нийтээр тархсан цар тахлын дэгдэлтээс үүдэлтэй эдийн засгийн хүндрэл оны хоёр дугаар хагаст хүчтэй мэдрэгдэнэ гэдгийг эдийн засагчид сануулсан. Тэгвэл улс төрийн ууган хүчин МАН бага хурлын гишүүдийнхээ 100 хувийн саналаар намын дарга Ухнаагийн Хүрэлсүхийг дахин Ерөнхий сайдад нэр дэвшүүлсэн.

Ерөнхийлөгч зөвшилцөх саналыг хүлээн авч өнөөдөр чуулганы нэгдсэн хуралдаанаар түүнийг томиллоо. Тэрээр шинэ засгийн газар мэргэжлийн хүмүүсээр багаа бүрдүүлж цар тахлаас сэргийлэн ажиллах төлөвлөгөөний хүрээнд улсын төсвийг тодотгож эдийн засгийг дэмжих олон ажил хийнэ хэмээн хэллээ.

У. ХҮРЭЛСҮХ: ШИНЭ ЗАСГИЙН ГАЗАР БАЙГУУЛАГДААД УЛСЫН ТӨСӨВТ ТОДОТГОЛ ХИЙНЭ

Эдийн засгийн хүнд нөхцөлд өнөөгийн засгийн газар боломжийнхоо хэмжээнд ажилласан гэдгийг тэрээр онцоллоо. Цаашид ч байгаа нөөц боломжоо дайчлан ажиллана гэдгийг хэллээ. Үүнээс гадна аливаа шийдвэр, гарсан хууль тогтоомж төрийн алба болоод бүх шатандаа хэрэгждэг байхад анхаарч, аж ахуй нэгжүүдээ бодлогоор дэмжихийг хэллээ. УИХ-ын гишүүд Ерөнхий сайдаар улиран сонгогдож байгаа У.ХҮрэлсүхээс асуулт асууж хариулт авсан юм.

Ерөнхий сайдын зүгээс эдийн засгийг дэмжих олон ажил хийхээс гадна шударга ёсыг тогтоож байгалийн баялгийг зөв зохистой ашиглахад онцгой анхаарна гэдгийг хэллээ. Улмаар нийт гишүүдийн 93.3 хувийн саналаар МУ-ын 31 дэх Ерөнхий сайдаар Ухнаагийн Хүрэлсүхийг томиллоо. Тэрээр 2000 онд анх удаа УИХ-ын гишүүнээр сонгогдож байсан бол 2014 онд засгийн газрын гишүүн МУ-ын шадар сайд, 2017 оноос өнөөдрийг хүртэл МУ-ын Ерөнхий сайдаар ажиллаж байна.

ФЭЙСБҮҮК ШУУД ҮЗЭХ