Засгийн газар

“Өмнөд Бүсийн Цахилгаан Түгээх Сүлжээ” ТӨХК болон “Оюу Толгой” ХХК хамтран “Цахилгаан эрчим хүчээр хангах гэрээ”-нд гарын үсэг зурлаа. Оюу Толгойн орд газрыг ашиглаж эхэлснээс хойш буюу 2013 оноос уурхай БНХАУ-ын Өвөр Монголын Өөртөө Засах Орон эрчим хүчний системээс импортын цахилгаан эрчим хүч авч ирсэн. Тэгвэл уг гэрээг байгуулснаар “Оюу Толгой” уурхайн цахилгаан эрчим хүчний зарим хэрэглээг дотоодоосоо хангах боломжтой боллоо.

Монгол Улсын Засгийн газраас Өмнөд бүс, говийн стратегийн орд газруудын цахилгааны хэрэглээг дотоодын эрчим хүчний системээс хангах зорилгоор 220 киловольтийн гурван дэд станц, 670 км урттай цахилгаан дамжуулах агаарын шугамыг барьж дуусгажээ.  Дотоодын эрчим хүчний системээс уурхайн цахилгааны зарим хэрэглээг хангах ажлын техникийн болон Улсын комисс ажиллаж 13 мегавольт ампер /МВА/ суурилагдсан хүчин чадал бүхий 4 дэд станцыг 35 кВ-ын хүчдэлийн түвшингээр хангаж эхэлсэн болохыг Эрчим хүчний  яамнаас мэдээллээ.

Н. ТАВИНБЭХ: ЭРЧИМ ХҮЧЭЭ ДОТООДООСОО ХАНГАСНААР ГАДАГШ УРСАХ ИХ ХЭМЖЭЭНИЙ ВАЛЮТ МОНГОЛ УЛСАД ҮЛДЭНЭ

 

Өмнөд бүсийн цахилгаан түгээх сүлжээ” ТӨХК болон “Оюу Толгой” ХХК-ийн хооронд “Цахилгаан эрчим хүчээр хангах” гэрээ байгуулснаар гадагш урсаж буй валютын урсгал дотооддоо үлдэж, эдийн засагт эерэг үр дүн гарах юм. Мөн цаашид цахилгаан эрчим хүч нийлүүлэлтийн хэмжээг үе шаттайгаар нэмэгдүүлж ажиллана гэдгийг онцоллоо.

Оюу Толгой уурхайг цахилгаан эрчим хүчээр хангах энэхүү схем нь эх үүсвэрүүдийн үйлдвэрлэлээс хамаарч нийт 40 МВт хүртэл чадлаар хангах боломжтой аж. Одоогоор тус уурхай нь хэрэглээнийхээ 1% буюу 1.3 МВт чадлыг төвийн бүсийн нэгдсэн системээс хэрэглэж байгаа юм. Цаашид энэ хүчин чадлыг үе шаттайгаар нэмэгдүүлж ажиллахаа албаныхан мэдэгдлээ.