Засгийн газар

Ирэх долоо хоногт манай улсад Бүгд Найрамдах Хятад Ард Улсын Гадаад хэргийн сайд Ван И айлчлах гэж байна. Хятадын Гадаад хэргийн сайд болон бусад албаны төлөөлөгчид Оросын Холбооны Улс болон бусад улс оронд хийх айлчлалаа дуусгаад манай улсад ирэх юм. КОВИД-19 халдвараас сэргийлж байгаа цаг үе гэдгээрээ айлчлал өмнөхөөсөө нэлээд өвөрмөц хэв маягтай, онцлогтой болохоор байна. Хятадын төлөөлөгчид болон уулзсан хүмүүсийг тусгаарлан шинжилгээнд хамруулахаас гадна уулзалт хийх танхим, хоол идэх газрыг хүртэл урьдчилан бэлтгэхээр төлөвлөжээ. 

Монгол Улсын Гадаад харилцааны сайд Н.Энхтайваны урилгаар БНХАУ-ын төрийн зөвлөлийн гишүүн, Гадаад хэргийн сайд Ван И энэ сарын 15-16-ны өдрүүдэд албан ёсны айлчлал хийхээр болжээ. Айлчлалын гол зорилго нь хоёр талын хамтын ажиллагааг идэвхжүүлэх мөн хоёр орны дээд түвшний айлчлалын давтамжийг хадгалахад оршиж байгаа гэдгийг ГХЯ-наас тодотголоо.  Мөн айчлалын үеэр уул уурхайн болон бусад бүтээгдэхүүний экспортыг нэмэгдүүлэхэд чиглэсэн арга хэмжээний талаар ярилцах шаардлагатай байгааг албаныхан онцоллоо.

Ш. Одонбаатар: БНХАУ-ын энэ удаагийн айлчлал эдийн засгийн томоохон төсөл, хөтөлбөрт түлхэц болно

Айлчлалыг өндөржүүлсэн бэлэн байдалд зохион байгуулах учир аль болох цөөн хүн оролцуулахаар бэлтгэл хангаж байгаа гэдгийг ЭМЯ-наас мэдэгдлээ. Айлчлалд оролцох  бүх хүмүүст коронавирус илрүүлэх лабораторийн PCR шинжилгээ хийх юм. Тус шинжилгээний хариу 6-8 цагт багтаан гаргахаар бэлтгэлийг хангажээ. Мөн айлчлалын бүрэлдэхүүнд багтаж ирсэн хүмүүсийн байрлах байранд ЗӨСҮТ-өөс урьдчилан ариутгал халдваргүйжүүлэлт хийхээр болсон байна.

Энэхүү айлчлалын гол үр дүн бүх талын хамтын ажиллагааг үргэлжлүүлэх, худалдаа эдийн засгийн хамтын ажиллагаанд гарсан ахицыг бататгахад оршиж байгааг ГХЯ-наас тодотголоо. Үүнээс гадна эдийн засгийн томоохон төсөл, хөтөлбөрт түлхэц болно гэж үзэж байгаа юм. Мөн айлчлалын үеэр хоёр тал хамтын ажллагааны баримт бичигт гарын үсэг зурна гэдгийг ГХЯ-наас мэдээллээ.