Халуун сэдэв

Салхитын мөнгөний ордыг ашиглан эхний үр шимээр нь ахмадуудын тэтгэврийн зээлийг тэглэх санал гаргаснаа ерөнхийлөгч шинэ оны босгон дээр зарласан. Хэзээнээс хэрэгжих, зээлгүй иргэд хэрхэх, ямар зохицуулалт хийгдэх вэ зэрэг олон асуулт хөвөрч байгаа юм. Энэ асуудалтай холбогдуулан зарим гишүүн хуулийн төсөл хүртэл боловсруулах ажилд шуурхайлан оржээ. Үндэсний аюулгүй байдлын зөвлөлөөс гаргаж буй энэ саналыг эцсийн байдлаар улсын их хурал шийдэх юм. Харин улсын их хурлын гишүүд энэ асуудалд ямар байр сууринаас хандаж байгааг үзэгч танд хүргэе.

Тэтгэвэр авч байгаа 300 мянган өндөр настнаас 216 мянга гаруй нь тэтгэврийн зээлтэй байна. Зээлийг тэглэхэд 776 тэрбум төгрөг шаардлагатай.  Салхитын мөнгөний ордыг эргэлтэд оруулах замаар энэ мөнгийг босгоно гэдгийг ерөнхийлөгч мэдэгдсэн. Ерөнхийлөгчийн шинэ оны босгон дээр ахмадуудаа баярлуулсан энэ шийдвэрийг гишүүд ч дэмжиж байгаагаа хэллээ.

Монгол улсын ерөнхийлөгчийн ард түмэндээ өгсөн амлалтын жагсаалтын эхэнд өр тэглэх асуудал багтсан. Энэ амлалт эхнээсээ хэрэгжиж байна гэдгийг УИХ-ын гишүүн С.Эрдэнэ мэдэгдсэн. Гэхдээ Үндэсний аюулгүй байдлын зөвлөл шийдвэр гаргадаг байгууллага биш, төсөвтэй холбоотой асуудлыг ярих ёсгүй гэдгийг ч санууллаа. Нөгөө талаар энэ мэдээлэлтэй холбоотойгоор зээлгүй иргэд зээл авах, арилжааны банкууд зээл олгохоо зогсоох зэрэг зарим хүндрэл гарч болзошгүй гэдгийг гишүүд хэлсэн юм.

УИХ-ЫН ГИШҮҮН О.БААСАНХҮҮ ТЭТГЭВРИЙН ЗЭЭЛГҮЙ ИРГЭД НЭГ УДАА ЗЭЭЛ АВЧ ТЭГЛҮҮЛЭХ ХУУЛИЙН ТӨСӨЛ БОЛОВСРУУЛЖЭЭ

Салхитын мөнгөний ордын өмчлөх эрхийн асуудал эцэслэн шийдэгдсэн эсэх, шаардлагатай мөнгө байгаа юу зэрэг тодорхойгүй хэд хэдэн асуудал байгаа ч гишүүд хуулийн төсөл боловсруулаад эхэлжээ. Өнөөдөр УИХ-ын гишүүн О.Баасанхүү тэтгэврийн зээлийг тэглэх хуулийн төсөл боловсруулснаа танилцууллаа. Хуулийн төсөлд зээлгүй иргэд нэг удаа зээл авч тэглүүлэх боломжтой гэсэн зүйл заалт оржээ.  

МАН-ын бүлгийн хурал дээр тэтгэврийн зээлтэй холбоотой асуудал яригдаж байжээ. Гэхдээ зээл тэглэх бус хүүг бууруулах талаар ярилцсан байна. Харин энэ удаад Үндэсний аюулгүй байдлын зөвлөлөөс гаргасан шийдвэрийг гишүүд дэмжиж байгаа ч тооцоо, судалгаа хангалтгүй байна гэдгийг хэлсэн юм.