Нийгэм

Дэлхий дахины аюулгүй байдлыг хангах, энхийг сахиулах үйл хэрэгт манай улс идэвхтэй оролцож байгаа. Тодруулбал, НҮБ болон бусад бүс нутгуудад 18,000 гаруй цэнхэр дуулгатнаа илгээн үймээн самуунтай, босогчдын дунд энх тайван, аюулгүй байдлыг ханган ажиллажээ.

Монгол Улсын Зэвсэгт хүчний цэргийн алба хаагчид НҮБ-ын энхийг сахиулах ажиллагаанд 2002 оноос хойш оролцох болсон. Одоогийн байдлаар Африк тив болон Афганистан улсад нийтдээ 6 ажиллагаанд 1000 гаруй алба хаагч үүрэг гүйцэтгэж байгаа. Монгол Улсын хувьд цэрэг хандивлагч орнуудын жагсаалтад 26 дугаарт бичигддэг байна.

Монгол Улсын Зэвсэгт хүчин дэлхийн улс орнуудын энх тайван, аюулгүй байдлыг хангах үйл хэрэгт тууштай оролцож, НҮБ-ын байнгын цэргийн хүчний тогтолцоонд чухал байр суурийг эзлэх болсон. Манай улсаас энхийг сахиулахаар явж байгаа цэргүүд эх орныхоо нэрийг өндөрт өргөн, олон тэмцээн уралдаанд тэргүүн байр эзэлдэгээс гадна НҮБ-ын хамгийн чухал баримтлал болох энгийн иргэдийг авран хамгаалах ажилд хариуцлагатай, чадварлаг оролцдог гэдгийг онцоллоо.

Монгол Улсын Зэвсэгт хүчнээс энхийг сахиулах ажиллагаанд оролцохдоо дэлхий дахинд болон бүс нутагт энхтайван, тогтвортой байдлыг хангах, цэргийн итгэлцлийг бэхжүүлэх, үндэсний аюулгүй байдлаа улс төр, дипломатын аргаар хангах зорилтыг дэвшүүлэн ажиллаж байгаагаа дурдлаа. Мөн Монгол Улсын гадаад нэр хүнд өсөж, олон улсын түвшинд өндрөөр үнэлэгдэх, улс орныхоо аюулгүй байдал, оршин тогтнохын баталгааг бэхжүүлэхэд энхийг сахиулагчдын оролцоо, хичээл зүтгэлийн хувь нэмэр их байдаг гэдгийг БХЯ-наас мэдэгдлээ.