Нийгэм

ЭХЭМҮТ-ийн эзэмшил газарт Монголын үндэсний их сургуулийнхан удаа дараа халдсан талаар эмнэлгийн удирдлагууд хэвлэл мэдээллийн байгууллагад хандсаар байна. Эмнэлгийн зүүн урд талын хэсэг газрын хашааг авч, сургуулийн орц, гарцыг шийдсэн нь хууль бус үйлдэл. Асуудлыг хуулийн байгууллагаар шийдүүлнэ гэдгээ ЭХЭМҮТ-ийн төлөөллүүд ярьж байна.

Өнгөрсөн Бямба гарагийн өглөө 09:00 цагийн үед ЭХЭМҮТ-ийн хамгаалалтын ажилчдыг ээлж хүлээлцэх үеэр байгууллагынх нь зүүн урд талын хэсэг хашаа алга болсон байжээ. Эмнэлгийн хашааг өдөр нь буулгаж шөнө нь цемент цутган орц, гарц хийхийг завдсан гэдгийг эмнэлгийн удирдлагууд ярьж байна. Газрын маргааны асуудлыг холбогдох байгууллагаас эцэслэн шийдвэрлэх хүртэл барилгын ажлаа үргэлжлүүлэхгүй байхыг МҮИС-ийнханд төрийн хэд хэдэн байгууллагаас шаардсан байна. Гэсэн хэдий ч эмнэлгийн эзэмшлийн газарт удаа дараа халдсаар байгааг эмч, ажилчид ярилаа.

ЭХЭМҮТ 90 жилийн түүхтэй байгууллага.  Эмнэлгийг анх байгуулагдахад л байсан  хашааг 2013 онд суурин дээр нь дахин шинэчилжээ. Мөн эмнэлгийн эзэмшлийн газрын хэмжээ анх 89,000 м2 байсан ч өнгөрсөн хугацаанд газраа 77,000 м2 хэмжээтэй болтол бусдад алдаж үзсэн гэдгийг эмнэлгийн төлөөллүүд ярьсан юм. Хууль шүүхийн байгууллагаар явсаар эргээд 81,087 м2 газартай болсон байна. Энэ мэтээр эмнэлгийн эзэмшлийн газар руу дайрдаг асуудал байсаар ирсэн гэдгийг ЭХЭМҮТ-ийн төлөөллүүд ярьж байна.

ЭХЭМҮТ-ийн эзэмшлийн газарт халдаж, хашааг нь буулгасан асуудал салбарын сайдын чихэнд хүрснийг тэд ярилаа. Хэрэв МҮИС хууль бус үйлдлээ зогсоохгүй бол газрын маргааны асуудлыг цаашид хуулийн байгууллагаар шийдүүлнэ гэдгээ эмнэлгийн удирдлагууд ярьсан юм.