Улс төр

АНУ-ын төрийн нарийн бичгийн дарга Майк Помпео БНХАУ-ын коммунист намын албан хаагчдад виз олгох тал дээр хязгаарлалт тавьж байгаа тухай мэдэгдлээ. Энэ шийдвэр нь Ерөнхийлөгч Доналд Трампын зүгээс Хонгконгийн бие даасан байдлыг алдагдуулж байгаа Бээжингийн Засаг захиргаанд гаргаж байгаа хариу үйлдэл гэдгийг онцолсон байна. 

Майк Помпео өчигдөр цахим хэвлэлийн хурлын үеэр визний хориг арга хэмжээ нь намын одоо байгаа болон хуучин албан тушаалтнуудад хамарна гэдгийг мэдэгдсэн байна. Хонгконгийн үндэсний аюулгүй байдлын хуулийг өнгөрсөн сард Хятадын парламент буюу Бүх ард түмний үндэсний их хурлаар батласан. Энэхүү хуульд нэг улс хоёр засаглалтай засаг захиргааны бүс Хонгконгийг тусгаар тогтнох, террорист үйл ажиллагаа явуулах, гадны улс оронтой хуйвалдах зэргийг хориглосон тухай тусгасан. Энэ хуулийг АНУ-ын талаас эсэргүүцэж байгаа юм.  Доналд Трамп Хятад улсыг “нэг улс, хоёр засаглалын тогтолцоог нэг улс нэг засаглалын байдлаар зохицуулж байна хэмээн буруутгаж байгаагаа илэрхийлж байжээ. Ингэснээр Ерөнхийлөгч Доналд Трампын засаг захиргаанаас Хятадын коммунист намын албан хаагчдад визний хориг тавин эсэргүүцэл илэрхийлсэн хариу арга хэмжээ авч байна. Харин Вашингтонд байрлах БНХАУ-ын элчин сайдын яамнаас визний хориг тавьж байгаа шийдвэрийг эрс эсэргүүцэж байгаагаа илэрхийлжээ. Тодруулбал элчин сайдын яамны албан ёсны твиттер хуудсаар дамжуулан “АНУ-ын зүгээс шийдвэрээ цуцлан, Хятад улсын дотоод хэрэгт оролцохгүй байхыг хүсэе” гэсэн утга бүхий мэдэгдэл хийсэн байгаа тухай CNN агентлаг мэдээллээ. Хятадын эрх баригчдын зүгээс шинэ хуулийн тогтоомжийг хэрэгжүүлэхээр ажиллаж байна.