Дэлхий

Хонконгод дотоодын нөхцөл байдал өдрөөс өдөрт доройтож, ардчиллын төлөө тэмцэгчид тэмцлийн аргаа өөрчилжээ. Тэд ажил хэрэгч завгүй хотын томоохон авто замуудын хөдөлгөөнийг хааж, гудамж талбайд хаалт босгон хууль сахиулагчидтай мөргөлдөхөөс сэргийлэн, тэмцлийн өөр хэлбэрт шилжиж байна.

Хонконгийн жагсагчид Ша-тин дүүрэгт байрлах Хятад их сургуулийн дэргэд цагдаа хүчнийхэнтэй мөргөлдсөн байна. Энэ үеэр жагсагчид шатах шингэн бүхий лонх шидлэн, хууль сахиулагчид нулимс асгаруулагч хий цацан, резинэн сум ашиглажээ. Улмаар жагсагчид Хонконгийн хаа сайгүй олны хөл хөдөлгөөн ихтэй газруудын зам талбайг хааж, хаалт тавьснаас Хятад их сургууль болоод өөр бусад 11 их дээд сургуулийн хичээл сургуулийг хаахаас аргагүйд хүрчээ. Жагсагчид хотын гудамж талбайн хучилтыг авч түүгээр машин зам дээгүүр хаалт тавьж хөдөлгөөнд саад болохоос гадна томоохон авто замын хөдөлгөөнийг ч хаасан байна. Тэд ийм маягаар цагдаа хүчнийхний хот доторх хөдөлгөөнийг ч сааруулж байгаа юм.

Хонконгийн жагсагчдын тэмцлээс шалтгаалан үйл ажиллагаагаа зогсоогоод байсан хотын метро эсрэгээр ажиллаж эхэлжээ. Лхагва гарагийн өглөө тэмцэгчид метроны хэд хэдэн галт тэргийг галдан шатааснаас гадна Фо Тан станцын дохиоллын систем ажиллагаагүй болжээ. Үүний улмаас хотын метро үйл ажиллагаагаа хэсэгчлэн зогсооход хүрсэн юм.

Жагсагчдын тэмцлийн улмаас Хонконгод банкны 250 гаруй салбар үйл ажиллагаагаа зогсоожээ. Тэр дундаа HSBC, Standard Chartered Bank, Bank of China (Hong Kong) зэрэг 18 томоохон банкны 5 салбар тутмын нэг нь хаагдсан байна.

Австралийн Квинсленд, Шинэ Өмнөд Уэльс мужуудад өнөөдрийн байдлаар түймрийн 150 гаруй голомт асч байна. Австралид дэгдээд байгаа ойн түймэртэй холбогдуулан гамшгийн бүсэд онцгой байдал тогтоогоод байгаа юм. Австралид энэ жил хуурай халуун зун болж байгаагаас ойн түймэр дэгдэж, ихээхэн хэмжээний газар нутгийг хамраад байна. 

Дэлгэрэнгүй ...

Тайландын хууль сахиулагчид мянган кг хар тамхи хууль бусаар тээвэрлэж явсан хэргээр хоёр хүнийг баривчилжээ. Тэднийг Пичит мужид явуулсан тусгай ажиллагааны үеэр илрүүлэн баривчилсан байна.

Дэлгэрэнгүй ...

Араб-Израилийн хоорондын хямрал дахин олон улсын анхаарлын төвд орж, Ойрхи Дорнодын бүс нутагт нөхцөл байдал тогтворгүйтжээ. Гаазын зурвасын Хеврон хотоос холгүй, дүрвэгсдийн Арруб хуаранд Палестины иргэд болоод Израилийн цэргийнхэний хооронд мөргөлдөөн болсон байна. 

Дэлгэрэнгүй ...

Араб, Израилийн хоорондын хямрал дахин олон улсын анхаарлын төвд орж, Израилийн цэргийнхэн болон Исламын жихад бүлэглэлийнхэн харилцан гал нээж, нөхцөл байдал хурцаджээ. Исламын жихад бүлэг Еврейн улс орны газар нутаг тийш хэд хэдэн удаа пуужингаар харваж, барилга байшин зам гүүр өртсөний дараагаар Израилийн агаарын хүчин хариу гал нээж, цохилт дайралт хийсэн байна.

Палестины “Исламын жихад” бүлэглэлийн дайчдын харвасан пуужин Израилийн Сдерот хотын нутагт тусч, зам барилга байшингууд өртжээ. Үүний дараагаар Израилийн ерөнхий сайд Беньямин Нетаньяху мэдэгдэл хийж:- Израиль улс бүс нутгийн хямралыг гааруулахыг хүсэхгүй байна. Гэвч бид газар нутгаа гадны халдлагаас хамгаалахын тулд шаардлагатай бүх алхмаа авах болно гэжээ. Нетаньяху үүгээрээ Палестины алан хядах бүлэглэлийн эсрэг шаардлагатай бол удаан хугацааны тэмцэл хийхэд бэлэн гэдгээ илэрхийлсэн байна.

Палестины “Исламын жихад” бүлэглэл нөлөө бүхий удирдагчдынх нь аминд халдсан явдлын дараагаар Израилийн нутаг дэвсгэр лүү өгөх цохилтоо сэргээжээ. Тэд Гаазын зурвасаас Израилийн зүг 10-аад пуужин харвасан байна. Тэдгээр пуужингийн талыг нь Израилийн ПЭХСистемийн тусламжтай замаас нь тогтоон барьж, үлдсэн нь Сдерот хотод тусчээ. Палестины алан хядах бүлэглэлийн пуужингийн цохилтод хэд хэдэн хүн өртсөн талаар мэдээлж байгаа юм.

Мягмар гарагийн өглөө “Исламын жихад” бүлэглэлин нөлөө бүхий удирдагчдын нэг 42 настай Баха Абу аль Аттагийн амьдардаг байрыг Гаазын зурвасаас харвасан пуужин оносон юм. Израилийн цэгэн цохилтын дүнд Баха Абу аль Атта болон түүний эхнэр өртөн амиа алдаж, гэрт нь байсан 4 хүүхэд, нэг том хүн гэмтэж шархаджээ. Израилийн тал Аль Аттаг улсынх нь нутаг дэвсгэрт алан хядах ажиллагаа зохион байгуулсанд буруутгаж байсан юм.      

Шведын хууль хүчний байгууллагынхан дээрэм, танхай, зохион байгуулалттай гэмт хэрэгтэй тэмцэхэд чиглэгдсэн арга хэмжээгээ чангатгажээ. Өнгөрсөн бямба гарагт Шведын Мальмё хотын гудамжнаа гэгээн цагаан өдөр буудалцаан дэлбэрэлт болсны дараагаар ийм арга хэмжээ авахаас аргагүй байдал үүссэн гэж цагдаагийн байгууллага мэдээлж байгаа юм.

Мальмё хотод хууль бус хар тамхины наймаачдын хооронд болсон буудалцааны улмаас 15 настай өсвөр насны хүү амиа алджээ. Европын тайван амгалан улс орнуудын нэг болох Шведэд он гарснаас хойш гэмт хэргийн тоо эрс нэмэгдэж, өнгөрсөн хугацаанд 180 гаруй дэлбэрэлт болж, 26 хүн галт зэвсгийн суманд оногдон амиа алдсан байна.

Стокгольм хотын цагдаагийн газраас 10-р сард гаргасан тайланд дурьдсанаар элдэв гэмт хэргийн бүлэглэлтэй холбоотой 1,500 гаруй хүн хуулийн байгууллагад бүртгэгдэж, ингэхдээ тэдний нас залуужин, 16-аас доош насны өсвөр насны хүүхдүүд элдэв гэмт хэрэгт холбогдох болжээ.

Тэгвэл Швед улстай хил залгаа байрлах Дани улс Шведэд гэмт хэргийн гаралт нэмэгдэж байгаатай холбогдуулан энэ улстай залгаа хилийн бүс дэх харуул хамгаалалтаа нэмэгдүүлж, ирэх хагас жилийн хугацаанд баримт бичгийг шалгалтыг чангатгана гэдгээ мэдэгджээ.