Үйл явдал

Дэлхийн шинжлэх ухааны салбарын хамгийн нэр хүндтэй шагнал болох Нобелийн шагналтнуудыг тодруулан нэрлэх Нобелийн долоо хоног эхэллээ. Норвегийн Осло, Шведын Стокгольм хотуудад Нобелийн долоо хоног эхэлж, шинжлэх ухааны салбарын шилдгүүдийг тодруулан, анагаах ухаан-физиологи, хими, физик, утга зохиол, энхтайвны үйл хэрэг болоод эдийн засгийн салбарын шилдгүүдийг нэрлэх юм. Уламжлал ёсоор Нобелийн долоо хоног анагаах ухаан-физиологийн салбарын шилдгүүдийг тодруулан нэрлэснээр эхэллээ.

Тэгвэл энэ салбарт 2019 онд Нобелийн шагналыг Америк болон Их Британийн эрдэмтдийн баг хүртэж байна. Америкийн эрдэмтэн Уильям Келин, Грегг Семенц болон Их Британийн эрдэмтэн Питер Ратклифф нар бие организм дахь амьд биеийн эсүүд хүчилтөрөгчийн түвшнийг хэрхэн мэдэрч, хэрхэн хариу үйлдэл үзүүлдэгийг судлан, энэхүү нэр хүндтэй шагналын эзэд болжээ.

Стокгольм дахь Каролины анагаах ухааны институт Нобелийн анагаах ухаан, физиологийн салбарын шагналтнуудыг нэрлэжээ. Шведын шинжлэх ухааны академи Америк, Их Британийн эрдэмтдийн багийн судалгааны ажлыг өргөн хүрээг хамрах физиологийн ач холбогдол бүхий, цус багадалт, хорт хавдар, чихрийн шижин, мөн зүрхний эмгэг зэрэг олон өвчнийг эмчлэх анагаах үүд хаалгыг нээсэн чухал судалгаа гэж үзсэн байна. Шведын шинжлэх ухааны академиас гаргасан албан мэдэгдэлд “хүн төрөлхтөн олон зууны туршид хүчилтөрөгчийн хүний бие организмд үзүүлэх ач холбогдлыг сайтар мэддэг байсан ч эд эсүүд хүчилтөрөгчийн нөлөөнд хэрхэн хувирч, өөрчлөгддөг, ямар хариу үйлдэл үзүүлдэгийг мэддэггүй байсан” гэдгийг цохон дурьдсан байна. Нобелийн шагнал хүртсэн эрдэмтэн судлаачид хүчилтөрөгчийн түвшинг өсгөж, мөн бууруулдаг генийг идэвхжүүлэх, мөн идэвхигүй болгох аргыг судлан тогтоожээ. Энэ нь цаашлаад хорт хавдрын эсүүдийг устгахад чухал ач холбогдолтой нээлт болжээ. Хүний бие организм дахь хүчилтөрөгчийн хэмжээ биеийн хүчний ачаалал, тухайлбал спортоор идэвхтэй хичээллэх үед хүний биеийн хэсгүүдэд янз бүрийн хэмжээтэй байдгийг судалжээ. Нобелийн 2019 оны анагаах ухаан-физиологийн салбарын шагналтнаар тодорсон Питер Ратклифф нь Их Британийн Фрэнсис Крикийн институтэд, Уильям Келин Харвардын их сургуульд, харин Грегг Семенц нь Жон Хопкинсийн их сургуулийн судлаач юм байна.