Үйл явдал

Сербийн нийслэл Белград хотноо сүүлийн хоёр өдөр дараалан олныг хамарсан эмх замбараагүй байдал дэгдэж, үймээн самуунд автаад байна. Сербийн Скупшина буюу парламентын ордны дэргэд иргэд жагсаал цуглаан хийж, улмаар цагдаа хүчнийхэнтэй мөргөлдсөн байна. Сербийн ерөнхийлөгч Александр Вучич улс орондоо дэгдсэн үймээн самуунд гадны тусгай албадыг буруутган, Оросын элчинтэй хийх байсан уулзалтаа цуцалжээ.

Александр Вучич улс орондоо дэгдсэн үймээн самуун, жагсаал цуглааны талаар лхагва гарагт хийсэн мэдэгдэлдээ: -Энэ бол маш сайн зохион байгуулсан жагсаал байсан, манай аюулгүйн албад иргэдийн жагсаал цуглааныг таслан зогсоож, урьдчилан сэргийлж чадаагүй, тэд гадны тусгай албадын дэмжлэгтэйгээр зохион байгуулагдсан жагсаалыг урьдчилан харж чадаагүй нь тэдний алдаа байсан гэжээ. Белградад болсон жагсаалд олон төрлийн үзэл бодол бүхий нийгмийн хэсэг, тэр дундаа либерал болон европын үзэл баримтлалыг дэмжигчид байжээ.

Иргэдийн жагсаал Сербид коронавирусын цар тахлын дэгдэлт дахин дэгдэж байгаатай холбоотойгоор хөл хорио, онцгой байдал тогтоох нь зүйтэй гэсэн ерөнхийлөгчийн мэдэгдлийн дараа өрнөжээ. Гэсэн ч гудамж талбайдаа гарч жагссан хүмүүс цар тахлыг эсэргүүцсэн биш харин эсрэгээр улс төрийн агуулгатай уриа лоозон барин жагсчээ.

Жагсагчид Сербийн Скупшина буюу парламентын ордныг булаан эзлэхийг тэмүүлж байсанд үндэсний радикал бүлэглэлийнхэнийг буруутгасан байна. Жагсагчдыг тараахын тулд цагдаа хүчнийхэн нулимс асгаруулах хий ашиглаж, жагсагчид гудамж талбайд хогийн сав шатаан, эмх замбараагүй байдал үүсгэн үймсэн байна.