Үйл явдал

Хосууд болон гэр бүлийн гишүүд бие биенийхээ амь насыг хороох улмаар цогцосыг нуух аймшигт хэрэг дэлхийн аль ч улсад, нийгэмд түгээмэл биш ч ерөнхийдөө гардаг хэргүүдийн нэг. Гэхдээ гадаадын иргэд гэр бүл болон амьдраад энэ төрлийн хэрэг гарах нь ховор байдгаас гадна олон улсын анхаарлыг татан, шүүмжлэлд өртөн нь ч бий.

Өнгөрсөн 1-р сарын 10-ны өдөр Таиланд улсын Чонбури мужийн нэгэн далайн эргээс хар чемодан олдсон бөгөөд дотор нь эмэгтэй хүний цогцос байжээ. Энэ нь 33 настай БНХАУ-ын Гуандон мужийн иргэн болох нь тогтоогдсон юм. Талийгаач Таиланд улсын иргэнтэй гэр бүл болон амьдарч нэг хүүхэдтэй болсон байв. Түүний нөхөр амь насыг нь хороон, чемодан дотор цогцосыг нуусан байсан нь мөрдлөгийн явцад ил болжээ. Талийгаач 2018 онд Таиландад аялах үедээ нөхөртэйгөө танилцан удалгүй эх орон руугаа буцаж, чатаар тогтмол харилцан хайр сэтгэлийн холбоотой болж, хүүхэдтэй болсон байна. Харамсалтай нь хүүхэд ердөө гурван сартай байхад хэрэг гарч бүсгүй амь насаа алджээ. Тухайн үед БНХАУ-ын цахим сайтуудад энэ мэдээлэл хандалт өндөртэй байснаас гадна гадаадын иргэнтэй суухгүй байх уриалга, энэ сэдвийн доорх маргаан зөрчил газар аваад байсан. Одоо ч энэ сэдэвт иргэд ихээхэн анхаардагаас гадна Хятад улсад гадаадын иргэнтэй гэрлэхийг иргэдийн дийлэнх хувь нь эрс эсэргүүцдэг байна.