Хятадын баруун өмнөд хэсгийн Сычуань мужийн Яань хотод байгальд эрх дураараа амьдардаг аварга том биетэй хулсны баавгай хүмүүсийн амьдардаг бүс рүү орж иржээ. Аварга хулсны баавгай Яань хотын Шимиан дүүргийн томоохон авто зам дээр гарч ирсэн байна.

Аварга биетэй хулсны баавгай хулсны ойг орхин, зам дээр гарч ирснийг эндхийн нэгэн иргэн гар утсандаа буулган бичлэг хийжээ. Ма Хайоу гэртээ харихаар Шимиан дүүргийн байгалийн цогцолбор газрын дэргэдүүр явж өнгөрөх үедээ зам дээр гарч ирсэн хулсны баавгайг олж харжээ. Тэрээр утсаа гарган бичлэг хийж, эндхийн байгаль хамгаалагчдад мэдэгдсэн байна.

Байгаль хамгаалагчид тэр даруй ирж, онгон байгальд эрх дураараа амьдардаг хулсны баавгайн эрүүл мэндийн байдал, хоол хүнсээ хэрхэн олж идэж байгаа зэрэгт ажиглалт хийжээ. Тэдний ярьснаар Шимиан дүүргийн орчимд 32 хулсны баавгай байгальдаа эрх дураар амьдардаг байна.