Энэ сарын 22-23-ны өдрүүдэд АНУ-ын санал санаачилгаар уур амьсгалын өөрчлөлттэй тэмцэх асуудлаарх олон улсын дээд хэмжээний уулзалтыг онлайн, цахим хэлбэрээр зохион байгуулж байна. Олон улсын дээд уулзалтад дэлхийн 40-өөд улс орны удирдагчид нэгдэж, хүн төрөлхтөний өмнө тулгамдаад байгаа цаг агаарын дулаарал, уур амьсгалын өөрчлөлтийн талаар нэгдэн хэлэлцэж байна. Хоёр хоног үргэлжилж байгаа дээд уулзалтыг АНУ-ын ерөнхийлөгч Жо Байден удирдан явуулж байгаа юм.
Жо Байден олон улсын дээд уулзалтыг нээж хэлсэн үгэндээ: - Бид цэнхэр гариг дэлхийгээ хайрлан хамгаалж, ирээдүй үр хойчдоо байгаль эх дэлхийг одоогийн байдлаар, магадгүй илүү дээр нөхцлөөр өвлүүлж үлдээх нь өнөөдөр та бидний хүчин чармайлтаас ихээхэн хамаарна. Шинжлэх ухаан, байгаль дэлхий алдаатай байх учиргүй учраас би тэргүүлэх зэргийн мэргэжилтнүүд, эрдэмтэдтэй зөвлөлдөн ирээдүйн асуудал гэж хойш тавилгүйгээр уур амьсгалын өөрчлөлттэй тэмцэх асуудлыг өнөөдрөөс хэлэлцэж, хийж, хөдөлж эхлэх нь зүйтэй гэж үзэж байна. Бид нэгэнт энэ тал дээр анхаарал хандуулах цаг иржээ...” гэсэн байна.
Байден АНУ, 2030 он гэхэд агаар мандалд цацагдаж байгаа хүлэмжийн, хорт хийн хэмжээг одоогийнхоос 50%-иар бууруулж, 2050 он гэхэд тэглэх үүрэг зорилт өмнөө тавиад байгаагаа илэрхийлжээ. Түүнчлэн Вашингтон дэлхийн бусад улс орнууд, тэр дундаа аж үйлдвэрлэл өндөр хөгжсөн томоохон эдийн засаг бүхий улс орнуудад хандан энэ чиглэлд үйл ажиллагаа, идэвх санаачлагаа эрчимжүүлэхэд уриалсан байна.