Америкийн Merck эмийн компани COVID-19 коронавирусний эсрэг эм бэлдмэл гарган авснаа танилцуулжээ. Цар тахлын эсрэг эмийн клиник туршилт амжилттай болж, энэхүү эм бэлдмэл нь коронавирусний халдварын эрсдлийг бууруулж, нас баралтаас сэргийлдэг болох нь батлагджээ.

АНУ-ын эрх баригчид цар тахлын халдварын улмаас улс орондоо ирэх гадны иргэдэд коронавирусний дэгдэлттэй холбоотойгоор тодорхой журам тогтоон мөрдүүлж байсан. Тэгвэл цар тахлын вакцинд хамрагдсан гадны иргэдийг одооноос эхлэн ямарваа хориг саадгүйгээр нэвтрүүлэхээр болжээ. 

Европын улс орнуудад цар тахлын эсрэг бустер тун буюу коронавирусний эсрэг 3 дахь тун вакциныг хүн амдаа хийж эхэллээ. ДЭМБ-аас улс орнуудад вакцинжуулалтын үйл явц харилцан адилгүй явагдаж байгаагаас шалтгаалан бустер вакцины тарилгыг хойшлуулах хүсэлт тавьж байсан ч Европын орнууд хүн амдаа 3 дахь тун вакциныг хийж эхэлсэн байна.