Европын сансрын агентлаг эгнээндээ шинэ сансрын нисэгчид элсүүлнэ

Европын сансрын агентлаг эгнээндээ шинээр сансрын нисэгчид шалгаруулан авч эхэлжээ. Ингэснээр сүүлийн 11 жилийн хугацаанд Европын сансрын агентлаг анх удаа сансрын нисэгч, орлон нисэгчид болон шинжлэх ухааны эрдэм шинжилгээний ажилтнуудаар хүрээгээ тэлэх гэж байгаа юм.

Европын сансрын агентлаг эгнээндээ шинээр сансрын нисэгчид шалгаруулан авахдаа эмэгтэйчүүдийг, тэр дундаа хөгжлийн бэрхшээлтэй хүмүүсийг ч анкетаа өгч бүртгүүлэхэд уриалж байгаа юм. Европын сансрын агентлагт элсэхээр горилогч нь магистрын зэрэгтэй, тухайн салбартаа 3-аас дээш жил ажилласан туршлагатай байх шаардлагатай гэнэ. Түүнчлэн багаар ажиллах, ачаалал даах чадвартай байхыг шаардаж байна. Ийнхүү элсэгчид ирээдүйд ОУСС дээр ажиллахаас гадна мөн сар болон Ангараг гариг луу хийх нислэгт оролцох боломжтой юм.

Элсэгчдийг 3-р сарын 31-ээс эхлэн ирэх 5-р сарын 28-ны дотор бүртгэж дуусах юм. Улмаар ирэх оны 10-р сар хүртэл сонгон шалгаруулалтаа явуулахаар төлөвлөж байна. Европын сансрын агентлаг эгнээндээ байнган 4-6 сансрын нисэгч, мэргэжилтэн, мөн 20-иод орлон нисэгчид болон сансрын мэргэжилтэн бэлтгэнэ.