Articles

Элсэлтийн ерөнхий шалгалтын Монгол хэл бичгийн шалгалт ирэх Бямба гарагт болох гэж байна. Оюутан залуус, сурагчдын хувьд хамгийн чухал шалгалтын нэг юм. Нийтдээ 37 мянган сурагч бүртгүүлэн шалгалт өгөхөөр болсон байна. Монгол хэлний шалгалтын босго оноо 400 байх юм.

Нийслэлийн ерөнхий боловсролын гадаад хэлний гүнзгийрүүлсэн сургалттай 18 дугаар сургууль өнөөдөр гадаад хэлний өдөрлөг зохион байгууллаа.

Дараагийн сурвалжлагыг манай сэтгүүлч төв номын сангаас бэлтгэлээ. Амралтын өдөр номын сан элсэлтийн ерөнхий шалгалтад бэлтгэж байгаа сурагчид болон оюутан залуусаар дүүрдэг байна. Тэд чимээгүй орчинд, бүх төрлийн сурах бичгээ урдаа тавьж, бүх анхаарлаа хичээл сурлагадаа зориулж байгаагаа ярилаа. Ирээдүйд сайн хүчирхэг мэдлэгтэй сайн мэргэжилтэн байхын тулд одооноос шаргуу шамдах ёстой гэсэн үгсийг сурагчид онцолж байна.

Отелло дуурийн Дездоман, Тоскагийн Тоска, Учиртай гурван толгой дуурийн Нансалмаа гээд дэлхийн сонгодог 20 дуурийн гол дүрийг бүтээсэн зууны манлай дуурийн дуучин, Ардын жүжигчин Уртнасангийн нэрэмжит танхим хөгжим бүжгийн коллежид нээгдлээ. Урлагийн төлөө хоёргүй сэтгэлээр зүтгэсэн тэрээр амьдралынхаа сүүлийн жилүүдэд олон арван шавь төрүүлэн гаргасан гавьяатан юм.

Цар тахлаас сэргийлж амны хаалт тогтмол зүүж байгаа. Сургуулийн орчинд ч масктай байхыг шаардаж байгаа юм. Тэгвэл биеийн тамирын хичээлд маск зүүж орох нь хүүхдүүдийн эрүүл мэндэд харш гэдгийг зарим эмч нар анхааруулж эхэллээ. Олон улсад масктай дасгал хөдөлгөөн хийснээс үүдэн ухаан алдаж унасан, агаар дутагдсан зэрэг олон асуудал гарах болсон байна. Сургуулиуд энэ асуудлыг хэрхэн зохицуулж байгааг манай сэтгүүлч сурвалжиллаа.

Даваа гарагаас хоёр настай хүүхдүүд цэцэрлэгт явна. Нийслэлийн хэмжээнд цэцэрлэгт элсэх ёстой нийт хүүхдийн 30 орчим хувийг хамруулахаар төлөвлөж байна. Цэцэрлэгүүд хоёр настай хүүхдүүдээ хүлээн авах бэлтгэлээ хангаж эхэлсэн талаар албаныхан мэдээллээ. Цэцэрлэг тус бүрт хоёр настнуудыг хүлээн авах 1-2 бүлэг ажиллахаар болжээ.