Ковид-19

Дахин хоёр хүн эдгэрч өнөөдөр эмнэлгээс гарлаа. ХӨСҮТ-д онош батлагдсан 114 хүн хэвтэн эмчлүүлж байна. Өчигдөр 367 хүнийг шинжилгээнд хамруулахад хариу бүгд сөрөг гарчээ. Мөн өнөөдөр Дели-Улаанбаатарын онгоцоор 158 зорчигч ирсэн. ХӨСҮТ-д хоёр, УНТЭ таван сэжигтэй тохиолдлуудыг шилжүүлжээ.

Онош батлагдаж, ХӨСҮТ-д хэвтэн эмчлүүлж байсан хоёр хүн эдгэрч өнөөдөр эмнэлгээс гарлаа. Одоогоор нийт 26 хүн эдгэрч эмнэлгээс гараад байгаа бол ХӨСҮТ-д 114 хүн хэвтэн эмчлүүлж байна. Эдгэрсэн хүмүүсээс 15 нь ажиглах байранд байна. Харин 11 тохиолдол нь гэртээ тусгаарлагдаж байгаа юм. Эмнэлгээс эдгэрч гарсан иргэдийг 14 хоног ажиглалтад байлгаж, давтан шинжилгээнд хамруулдаг. Шинжилгээний хариу сөрөг гарсан тохиолдолд гэрт нь тусгаарлах арга хэмжээг авдаг юм.   

ХӨСҮТ-д тусгаарлагдаж байгаа найм, ажиглах байранд байгаа 315, тандалтын зорилгоор 17, нийт 367 хүнийг өчигдөр шинжилгээнд хамруулжээ. Эдгээр иргэдийн хариу бүгд сөрөг гарсан байна. Мөн өнөөдөр Дели-Улаанбаатарын онгоцоор 158 зорчигч ирсэн. Эдгээр зорчигчоос хоёр хүнийг ХӨСҮТ-д шилжүүлсэн. Бусад зорчигчдыг тусгайлан бэлдсэн тусгаарлах байруудад шилжүүлээд байгаа юм. Халдвар бүртгэгдсэн эрсдэлтэй улс орноос ирсэн учир яаралтай шинжилгээнд хамруулна гэлээ. 

Өнгөрсөн хугацаанд нийт 7408 иргэнийг тусгаарлан, шинжилгээнд хамруулжээ. Харин өнөөдрийн байдлаар 1769 хүн ажиглах байранд байна. Тусгаарлалтад байгаа иргэдийн дунд тав хүртэлх насны 170 хүүхэд, хавдартай 24 зэрэг нийт 127 эрүүл мэндийн шалтгаантай иргэд байгаа. Эдгээр иргэдэд мэргэжлийн эмч нар эмнэлгийн тусламж, үйлчилгээ үзүүлж байна. 

ФЭЙСБҮҮК ШУУД ҮЗЭХ