Ковид-19

ЕХ-ны улс орнуудад цар тахлын хоёр дахь давалгаа дэгдэхээс болгоомжилж байна. Франц, Герман зэрэг улс орны төр засгийн тэргүүлэгчид ЕХ-нд хандан, COVID-19 цар тахлын хоёр дахь давалгаа эрчимтэй дэгдсэн тохиолдолд ийм нөхцөл байдалд хэр бэлтгэлтэй байгаа талаар асуумж хүргэжээ.

Парис хотын прокурорын алба улс орондоо цар тахал дэгдэх үед төр засаг нь хэр шуурхай хүлээн авч, хүн амаа хангалттай сэргийлж, хамгаалж чадсан эсэхийг нягтлан шалгаж эхлээд байна. Францад цар тахлаар амиа алдсан эмч сувилагчид, иргэдийн зүгээс төр засгийнхаа эсрэг 30-аад гомдол санал гаргасны дагуу дээрх ажиллагааг явуулж байгаа юм.

Хэдийгээр ерөнхийлөгч Макроныг цар тахлын дэгдэлтийн дагуу хуулийн хариуцлагад татахгүй ч гэлээ улс орон нь цар тахалд хэр бэлтгэлтэй байсан, хүн амаа халдварт өвчнөөс хамгаалахын тулд нөөц бололцоогоо бүрэн дүүрэн ашигласан эсэхийг нягталж байна.

Энэ бүхэнтэй зэрэгцээд Германы Холбооны канцлер Ангела Меркель, Францын ерөнхийлөгч Эммануэль Макрон нар ЕХ-нд хандан хэрвээ цар тахлын хоёр дахь давалгаа дэгдвэл Европын орнууд ийм нөхцөл байдалд хэр бэлтгэлтэй байгаа талаар асуумж хүргүүлсэн байна. Ийнхүү хандаж байгаа шалтгаан нь Европын улс орнууд цар тахлын ид дэгдэлтийн үе ард хоцорсон гэж тооцон хөл хорио, карантины дэглэмээ яаран цуцалж байгаатай холбоотой юм.