Ковид-19

Дэлхийг түгшээж байгаа коронавируст халдвараас Монгол Улс найдвартай хамгаалсан хэвээр байна. Өнгөрсөн 24 цагт хийсэн бүх шинжилгээ сөрөг гарч нэмэгдсэн тохиолдол бүртгэгдсэнгүй. Харин хоёр оюутан бүрэн эдгэрч эмнэлгээс гарлаа. Тэднийг 42-50 хоногийн дотор эмчилсэн байна.

Өнөөдрийн байдлаар ХӨСҮТ-д 30 хүн эмчлүүлж байгаа бол сувиллын ажиглалтад 56, гэрийн тусгаарлалтад 66, хяналт тандалт дууссан 75 хүн байна. Эмнэлэгт хэвтэн эмчлүүлж байгаа хүмүүсийн 27 нь хөнгөн, гурав нь хүндэвтэр байна. Үүнд нэг жирэмсэн, нэг чихрийн шижинтэй хүн хэвтэн эмчлүүлж байна. Өчигдөр ХӨСҮТ-д тусгаарлалтад байсан жирэмсэн эмэгтэй ирж хүүтэй болжээ. Эдгэрч эмнэлгээс гарсан хүмүүсийн хувьд 42-56 хоногийн турш хэвтэн эмчлүүлсэн байна.

Вирусний шинжилгээг нийт 701 хүнд хийхэд халдвар илрээгүй. Үүнд ХӨСҮТ-д хэвтэн эмчлүүлж байгаа 12, ажиглах байрны 548 хүнд гурван удаагийн давтан шинжилгээ, Сөүл болон Франкфуртээс ирсэн хүмүүс үүнд хамрагдаж байна. Мөн тусгаарлах байрны 80 хүний давтан шинжилгээ, Алтанбулаг боомтоор орж ирсэн 33 жолооч, Сэлэнгэ аймагт тусгаарлагдсан 4, Замын-Үүд боомтоор орж ирсэн 23 хүнд, Дорноговь аймагт тусгаарлагдсан нэг хүнд шинжилгээ хийхэд халдвар илрээгүй. Өнөөдрийн байдлаар улсын хэмжээнд тусгаарлах байранд 2,996 хүн байна. 289 хүн өчигдөр тусгаарлалтад шинээр орж, 288 хүн тусгаарлалтаас гарч өрхийн тусгаарлалтад шилжжээ.

Цэргийн төв эмнэлэгт эмнэлгийн тусламж үйлчилгээ шаардлагатай 91 хүн тусгаарлагдан хянагдаж байна. Эдгээрийн дотор 6 хүн эрчимт эмчилгээний тасагт хэвтэн эмчлүүлж байгааг ЭМЯ-наас мэдээллээ. Дотооддоо халдвар тархаагүй гэж иргэд назгайрч, амны хаалт зүүхгүй байгааг эмч мэргэжилтнүүд шүүмжилж байна. Дэлхий нийтэд халдварын эрсдэл өндөр, агаараар тархан халдварлах эсрдэл байгааг эрдэмтэд тогтоосон учраас халдвар хамгааллын дэглэмийг мөрдөхийг анхааруулж байна. 

ФЭЙСБҮҮК ШУУД ҮЗЭХ