Ковид-19

Өчигдөр нийт 903 хүний сорьцыг шинжилжээ. Бүх хүний шинжилгээнээс коронавирус илрээгүй мэдээг ХӨСҮТ-өөс мэдээллээ. Мөн өнөөдөр нэг хүн эдгэрч, дараагийн шатны сувилал руу шилжжээ.

Долдугаар сарын 24-нд ХӨСҮТ-ийн вирус судлалын хоёр лаборатори, ЗӨСҮТ-ийн лаборатори, Дархан-Уул аймаг дах салбар лабораторид нийт 903 хүнд шинжилгээ хийсэн байна. Ингэхэд бүгдэд нь коронавируст халдвар илрээгүй.

Тодруулбал, долдугаар сарын 4-нд Токио-Улаанбаатар чиглэлийн онгоцоор ирсэн 262 хүний 3 дахь давтан шинжилгээ, Истанбул-Улаанбаатар чиглэлийн нислэгээр ирсэн 262 хүний 2 дахь давтан шинжилгээг хийхэд коронавируст халдвар илрээгүй байна. Мөн БНХАУ-ын 191 иргэний шинжилгээг хийхэд мөн коронавируст халдвар илрээгүй гэлээ.

Өнөөдөр нэг хүн эдгэрч ХӨСҮТ-өөс гарч, дараагийн шатны ажиглалтад шилжлээ. Энэ хүн нь 31 настай эмэгтэй, 32 хоног эмчлүүлжээ. Монгол Улсад батлагдсан тохиолдол 288 байгаагаас 218 хүн эдгэрч, дараагийн шатанд шилжээд байгаа юм. Эмчилгээнд 70 хүн байгаа. Үүнээс 61 хүний биеийн байдал хөнгөн, есөн хүний биеийн байдал хүндэвтэр байна гэж үнэлэгджээ.

ФЭЙСБҮҮК ШУУД ҮЗЭХ