Ковид-19

Коронавируст цар тахалтай холбоотой ээлжит мэдээг хүргэе. ДЭМБ-ын тэргүүн Тедрос Адханом Гебрейсус коронавирусний халдвар хоёр жилийн дотор дуусна гэж таамаглаж байгаагаа мэдэгдсэн байна. 1918 оны Испанийн цар тахал ч бас хоёр жилийн дотор дууссан түүхтэй. Гэхдээ одоо илүү хөгжсөн нийгэмд байгаа учраас хүмүүсийн хичээл зүтгэлээр илүү богино хугацаанд дуусгаж болохыг тэрээр онцлон мэдэгдлээ.

ДЭМБ-ын тэргүүн Тедрос Адханом баасан гарагт Женев хотноо хийсэн мэдэгдлийнхээ үеэр өндөр хөгжилтэй энэ том нийгэмд халдвар амархан тархаж байгаа ч, үүний зэрэгцээ халдварыг 1918 оны тахлаас ч богино хугацаанд дуусгах боломжтойг хэлсэн байна.  Үүнээс гадна хүмүүс бид дэлхийн хэмжээнд эвээр нэгдэн, халдварыг дарж авах хангалттай мэдлэг, боловсролтой хөгжилтэй нийгэмд байгааг онцолжээ. 1918 оны Испанийн ханиадны үеэр дэлхийн 50 сая иргэн амь насаа алдсан. Коронавируст халдварын тухайд найман сарын хугацаанд 23 сая орчим хүн халдвар авснаас 800 мянга нь нас баржээ. Мэдэгдлийн үеэр ДЭМБ-ын дээд албан тушаалтан Майк Райн хэлснээр Мексик улсад 100,000 хүн тутмын гурав нь шинжилгээнд орсон байгаа бол АНУ-д 100,000 хүн тутмын 150 нь шинжилгээ өгсөн байна. Үүнээс харахад сүүлийн хоёр сар орчим халдварын дэгдэлт буурахгүй байгаа Мексикт нөхцөл байдал ямар ч хяналтгүй байгааг хэлжээ. Мексик улс дэлхийн хамгийн их халдвараар нас баралт бүртгэгдсэн дөрөвдөгч улсаар нэрлэгдэж байгаа. Тодруулбал халдвар дэгдсэнээс хойш 60 мянга орчим халдвараар нас барсан тохиолдол бүртгэгджээ.