Эрүүл мэнд

Долоо хоногийн эхэнд гэмтлийн эмч нар өвдөгний үеийг бүтнээр солих хагалгааг анх удаа амжилттай хийсэн. Тэгвэл өнөөдөр 1-р төв эмнэлэг энэ амжилтыг дахин ахиулж байна.  Өвчтний өвдөгний үеийг дурангаар харж бүтэн эсвэл хэсэгчлэн солих эсэхийг шийдэх боломжтой болжээ. Мөн донороос өвдөгний үе шилжүүлэн суулгах боломжийг бүрдүүлсэн байна.  

Өнгөрсөн 7 дугаар сараас эхлэн УНТЭ-т өвдөгний үений дурангийн мэс засал болон хагас хиймэл үе хийх мэс заслыг хийж эхэлсэн байна. Дурангийн мэс заслын шинэ аргыг нэвтрүүлснээр хагас болон бүтэн хиймэл үе хийх эсэхээ урьдчилан харах боломжтой болжээ. 

Өнөөдөр УНТЭ-т хийгдсэн мэс заслын хувьд дурангаар урьдчилан үеийг шалгаад бүтэн эсвэл хагас үе суулгахаа тогтсон юм. Өвчтний хувьд дурангаар харахад үе хоорондын мөгөөрс урагдаж гэмтсэн байсан. Хагалгааны үеэр урагдаж гэмтсэн сийрэгжих мөгөөрс, холбоосыг янзалж, өвдөгний үений дотор талд хагас хиймэл үе суулгах мэс заслыг хийж гүйцэтгэлээ. Манай улсын хувьд өвдөгний үений хагас болон бүтэн хиймэл үе хийх мэс заслыг хуулийн дагуу донороос авч хийх болсон гэж эмч мэргэжилтнүүд хэлж байна. 

Одоогоор өвдөгний үений дурангийн жийргэвч мөгөөрс, холбоосыг сэргээх мэс заслыг 30 хүнд хийгээд байгаа юм байна. Хагас хиймэл үе суулгах мэс заслыг зургаа дахь хүндээ хийж байгаа гэж албаныхан хэлж байна.