Эрүүл мэнд

Хан-Уул дүүргийн нэгдсэн эмнэлэг 30 ортой хүүхдийн тасгаар хүч нэмлээ. Ханиад томууны дэгдэлт их байгаа үед эмнэлгийн ачаалал 40 орчим хувиар буурч байгааг эмч мэргэжилтнүүд онцолж байна. Өргөтгөлийн ажлыг Хан-Уул дүүрэг олон улсын Good Neighbors буюу Сайн хөрш төрийн бус байгууллагатай хамтран гүйцэтгэжээ.

Улирлын томуугийн дэгдэлтийн үед дүүргийн эмнэлгүүд хүүхдийн орны тоогоо нэмэгдүүлж, бэлэн байдалд ажиллаж байна. Өнөөдөр Good Neighbors  ОУТББ-аас хэрэгжүүлсэн “Dream hospital төслийн хүрээнд ХУД-ийн Нэгдсэн эмнэлгийн хүүхдийн эмнэлэгт 30 ортой шинн тасгийг хүлээлгэн өглөө. Олон улсын стандартын шаардлага хангасан тус тасаг нэмэгдснээр эрүүл мэндийн тусламж авах хүүхдүүд хүлээхгүй, коридорт хэвтэх шаардлагагүй болж байна гэж албаныхан хэлж байна.

ХУДНЭ нь 80 ортой хүүхдийн тасгаар дүүргийн 60 мянга гаруй хүүхдэд тусламж үйлчилгээ үзүүлдэг байсан байна. Шинэ тасаг нээгдснээр хүүхдийн тасгийн хүчин чадал 40 орчим хувиар нэмэгдэж байгаа юм.

Мөн энэ үеэр Хүүхдийн тасагт шаардлагатай 30 сая төгрөгийн үнэ бүхий орчин үеийн тоног төхөөрөмжөөр хангалаа. Good Neighbors  олон улсын төрийн бус байгууллагын тухайд 2011 оноос нийслэлийн 6 дүүрэг, орон нутагт 9800 хүүхдүүд тэдний гэр бүлд хүрч ажиллажээ.