Эрүүл мэнд

Ханиад томууны дэгдэлт их байгаа үед эмнэлгүүдийн ачаалал ихэссээр байна. Тийм учраас эмнэлгүүдийн хүчин чадлыг нэмэгдүүлэхэд онцгой анхаарч байгаа юм. Саяхан Хан-Уул дүүргийн нэгдсэн эмнэлэг хүүхдийн шинэ тасаг нээсэн бол өнөөдөр Сонгино хайрхан дүүргийн эмнэлэг мөн хүчин чадлаа нэмэгдүүлжээ. Тэд ашиглагдаагүй заал танхимаа тохижуулж ирсэн хүүхэд бүрт үйлчилгээ үзүүлэх хэмжээнд хүргэсэн байна.

СХД-ийн хүүхдийн нэгдсэн эмнэлэг 165 орны хүчин чадалтай ч энэ хүчин чадлыг 2 дахин нэмэгдүүлсэн их ачаалалтай ажиллаж байна. Хүйтний хэм эрс чангарсан өнгөрсөн баярын өдрүүдэд ачаалал хоёр дахин нэмэгдэж, заавал хэвтэн эмчлүүлэх шаардлагатай хүүхдийн тоо эрс өссөн байна. Эмнэлгийн зүгээс дотоод нөөц бололцоогоо ашиглан эмнэлгийн өдрийн үзлэгийн амбулатори хэсэгт 120 гаруй ор нэмэлтээр дэлгэж, хэвтэн эмчлүүлэх тасаг болгон 20 гаруй өрөөг тохижуулжээ. СХД нь нийт 43 хороотой, нийслэлийн хэмжээнд хамгийн их хүн амтай томоохон хороодын нэг. Тэр хэрээрээ эмнэлэг эмнэлгийн байгууллагад ирэх ачаалал өндөр байдаг байна. Хүйтний эрч чангарч, баяр ёслол давхацсан өнгөрсөн өдрүүдэд ханиад томууны тархалт болон хүндэрч ирсэн хүүхэд их байгааг хэллээ.

2-4 ортой 20 орчим тасгийг шинээр тохижуулж, хэвтэн эмчлүүлэх шаардлагатай хүүхдийг тус өрөөнд хүлээж авч, ачааллыг зохицуулж байгаа гэлээ.  Өдөртөө тус хүүхдийн нэгдсэн эмнэлгийн хүлээн авахаар 100 гаруй хүүхдэд үйлчилгээ үзүүлж, үзлэг оношлогоо хийж байна. Энэ нь нэг эмчид 30-40 хүүхэд ноогдож, өдөр бүр энэ хэрийн өндөр ачаалалтай ажилладаг гэж байна.

Харин сурагчдын амралт эхэлсэн эдгээр өдрүүдэд ачаалал харьцангуй багассан боловч баярын өдрүүдэд нэмэгдсэн гэлээ. Эмнэлгийн орчинд хэвтэн эмчлүүлж байгаа хүүхдээ сахиж байгаа эцэг эхчүүдийн зарим нэг ухамсаргүй үйлдэл, тухайлбал зөвхөн эмнэлгийг орчинд өмсөх ёстой углааштай гадна орчинд гарч тамхи татах, маск хэрэглэдэггүй, тамхины эхүүн үнэр, үнэр шингэсэн хувцастай өвчилсөн хүүхдийн эргэн тойронд байх зэрэг нь эргээд хүүхдийн өвчлөлд нөлөөлж байгааг хэллээ. СХД-ийн хүүхдийн эмнэлэгт өнөөдрийг байдлаар 200 гаруй хүүхэд хэвтэн эмчлүүлж байна.