Эрүүл мэнд

Эрүүл мэндийн яам коронавирусын халдварын талаарх ээлжит цаг үеийн мэдээллээ хүргэлээ.  Халдвар авсан нэг хүн цаашид 5-6 хүнд тараах магадлалтай.  Харин өвчний нууц хугацаа 2-14 хоног гэдгийг анхааруулж байна. Манай улсын хувьд хилээ албан ёсоор хаагаагүй ч иргэдийн орж гарах урсгалыг хязгаарласан. Ингэснээр иргэд урд хөрш рүү зорчихдоо гаалийн байгууллагаас заавал зөвшөөрөлтэй бичиг авах ёстой юм.  Монгол улсын хувьд эрсдэл өндөртэй бүсэд хамаарч байгаа учраас иргэдийг халдвар хамгааллын дэглэмээ бууруулахгүй байхыг санууллаа. 

Зарим хилийн боомтуудын зорчих хэсэгт хязгаарлалт хийсэн.  Авто болон төмөр зам, агаарын хилийг бүрэн хаагаагүй. Харин албан ёсны бичиг, нотлох албан шаардлагаа хилийн шалганы хэсэгт шалгуулаад, хилээр нэвтэрч болно гэж байна.  Мөн Хятад улсын иргэд манай  улсад хуулийн байгууллагын ямар ч хяналтгүй орж ирж байна гэсэн мэдээлэлд хил хамгаалах ерөнхий газраас албан ёсоор өнөөдөр  хариулт өглөө.

Хилийн шалган нэвтрэх хэсгээр ямар нэгэн зөвшөөрөлгүй Хятад улсын иргэдийг нэвтрүүлсэн гэх асуудал байхгүй, хилийн зорчих хэсэгт зарим нэг хязгаарлалт хийгдсэн. Энэ дагуу хилээр нэвтрэх иргэдэд хяналт шалгалт хийж байгаа гэлээ. Түүнчлэн Монгол улсын хилээр ойрын хугацаанд нэвтэрсэн тээврийн хэрэгсэл болон зорчсон иргэдийн мэдээллийг дурьдлаа.  Мөн хамгийн сүүлд Гашуун сухайтын боомтод илэрсэн сэжигтэй 12 тохиолдлыг илрүүлж, шинжилгээний сорьцыг Халдварт өвчин судлалын үндэсний төв рүү шилжүүлээд байгаа гэлээ.

Цагдаагийн байгууллага болон мэргэжлийн хяналт, эрүүл мэндийн байгууллагууд хамтран ажиллах, хилээр нэвтэрч байгаа иргэдэд хяналт шалгалт хийхээс гадна Хятад улс руу тодорхой шалтгааны улмаас зорчиж байгаа иргэдэд санамж, зөвөлгөө өгч ажиллаж байна гэлээ. Ингэхдээ өвчний улмаас БНХАУ-ыг зорьж байгаа иргэд тус улсын хамгийн их эрсдэлтэй хэсэг рүү зорчиж, үйлчилгээ авч байгаа, зайлшгүй тохиолдолд тус улсад болон тус улсаар дамжин өнгөрөх тохиолдолд онцгой байдлын газраас заавал зөвшөөрөл авна ёстой гэдгийг санууллаа.