Эрүүл мэнд

Мэргэжлийн байгууллагуудаас шинэ төрлийн коронавирус буюу COVID 19-ийн талаар цаг үеийн мэдээлэл хийлээ.  Тархалт хурдацтай явагдаж нас барсан хүний тоо 253, халдвар авсан хүн 15 мянгаар нэмэгджээ.  Манай улсын хувьд сэжигтэй бүх тохиолдлууд сөрөг буюу халдваргүй гэж гарсан. Харин ийм эгзэгтэй цаг үед олон нийтийг төөрөгдүүлж худал мэдээлэл тараасан иргэдэд хариуцлага тооцсоор байгааг анхаарууллаа. Тухайлбал утсаар дуут мессеж илгээсэн Чингэлтэй дүүргийн иргэнийг олж тогтоон торгууль ноогдуулахаар болсон байна. 

Өндөр халуурч, ханиалгасан, бие нь өвдсөн зэрэг шинж тэмдэгтэй иргэдийг тусгаарлаж, энэ сарын 11-нд Сүхбаатар аймагт хоёр, Замын-Үүдэд хоёр сэжигтэй тохиолдолд шинжилгээ хийсэн байна. Дээрх тохиолдлуудын шинжилгээний хариу сөрөг гарсан байна. Мөн өчигдөр Дорнод аймагт нэг, ХӨСҮТ-д хоёр, Баян-Өлгий аймагт нэг тохиолдлыг тусгаарлан шинжилгээ авсан байна. Шинжилгээний хариу хараахан гараагүй байгаа юм. Баян-Өлгий аймагт гарсан сэжигтэй тохиолдол олон хүнийг хамарсан, тухайн иргэн олон хоногоор олон газар дамжин явсан байна.

Ухань хотоос ирсэн оюутнуудын биеийн байдал сайн, сэтгэл санаа тайван байгааг ХӨСҮТ-өөс мэдээллээ. Эдгээр оюутнуудад маргааш дахин шинжилгээ хийх болсон байна. Шинжилгээний хариу сөрөг гарвал эмнэлгээс гаргана гэлээ.

Коронавирусын халдвараас урьдчилан сэргийлэхэд иргэн, аж ахуйн нэгж байгууллагууд санаачлагатай ажиллах шаардлагатайг хэлж байна. Тухайлбал, албан байгууллагаар үйлчлүүлж байгаа иргэдийг гар угаах, ариутгах нөхцөл боломжоор хангах, орох бүрт нь халууныг нь хэмжих, амны хаалт зүүхийг шаардах зэргээр үйл ажиллагаандаа урьдчилан сэргийлэх арга хэмжээг тусгахыг санууллаа. Мөн шинэ төрлийн коронавирусын халдвартай зэрэгцэн худал мэдээлэл нийгмийн сүлжээгээр тархаж эхэлсэн. Хэд хэдэн хэрэг хууль хяналтын байгууллагаар шалгагдаж байна. Өчигдөр сошиалд тархсан дуут мессежийг тараасан хүнийг илрүүлж, шалгалтын ажиллагаа явуулж байгааг албаныхан мэдээллээ. 

ФЭЙСБҮҮК ШУУД