Эрүүл мэнд

ЭМЯ-наас ээлжит мэдээллээ хийлээ. Өчигдөр Берлин-Москва-Улаанбаатарын чиглэлээр 104 зорчигч ирснээс 17-г нь тусгаарласан.  Эдгээр иргэдээс хоёр нь халуурч, хоолой нь өвдсөн байдалтай байсныг шинжилсэн юм. Мөн өөр чиглэлээр ирсэн сэжигтэй иргэнээс шинжилгээ авчээ. Дээрх гурван тохиолдлын хариу сөрөг буюу халдваргүй гэж гарсныг мэдээллээ. 

Халдварын тохиолдол бүртгэгдсэн улс орноос ирсэн иргэдээс тодорхой асуумж авч, сэжигтэй тохиолдлыг тусгаарлан, шинжилгээнд хамруулж байгаа. Энэ дагуу өчигдөр Берлин-Москва-Улаанбаатарын нислэгээр ирсэн хоёр иргэнийг ХӨСҮТ тусгаарлан, шинжилгээнд хамруулсан байна. Тухайн хоёр иргэнээс коронавирусийн шинж тэмдэг илэрсэн гэдгийг ХӨСҮТ-өөс мэдээлж байсан юм. Эдгээр тохиолдлуудын шинжилгээний хариу сөрөг гарчээ. 

Өнгөрсөн хугацаанд Дархан-Уул , Сэлэнгэ аймаг болон Багабаян сувиллын газар, Улсын хоёрдугаар төв эмнэлэг зэрэг тусгаарлах байруудад 883 тохиолдлыг ажиглалтад авчээ. Харин өнөөдрийн байдлаар 497 иргэнийг ажиглалтад аваад байна.  Мөн сүүлд Истанбул - Москва – Улаанбаатарын нислэгээр 129 зорчигч ирсэн. Эдгээр зорчигчдоос хоёрыг нь Асралт мед, нэг иргэнийг ХӨСҮТ-д тусгаарлаж, ажиглалтад аваад байна. 

Тусгаарлах байрны ачаалал өнөөдрийн байдлаар 50 гаруй хувьтай. Гэхдээ цаашид сэжигтэй тохиолдлыг хүлээн авах байрыг нэмэх талаар төлөвлөгөө гарган ажиллаж байна. Тусгаарлах байрнаас гадна эрсдэл гарсан үед шинж тэмдэг илэрсэн тохиолдлыг хүлээн авах байрыг мөн нэмэгдүүлэхээр ажиллаж байгаа гэдгийг ЭМЯ-наас мэдээллээ. Олон улсад өвчлөл хумигдах шинж тэмдэг илэрч байгаа. Гэхдээ бид анхаарлаа сулруулж болохгүй, эрүүл мэндийн байгууллагаас өгч байгаа зөвлөгөөг дагахыг уриаллаа. 

ФЭЙСБҮҮК ШУУД ҮЗЭХ