Эрүүл мэнд

Дэлхийн эрүүл мэндийн байгууллагын Номхон далайн баруун бүсээс зохион байгуулдаг дархлаажуулалтын зөвлөх багийн хурал өнөөдөр цахимаар боллоо. Манай улсын хувьд бүх төрлийн өвчний дархлаажуулалт хэвийн, вакцин болон био бэлдмэл хүрэлцээтэй байгааг мэдээллээ. Харин бусад улс орны хувьд коронавирусний халдварын улмаас дархлаажуулалт доголдож эхэлснийг Дэлхийн эрүүл мэндийн байгууллага онцоллоо.

ДЭМБ-ын Номхон далайн баруун эргийн бүсээс жил бүр зохион байгуулдаг Дархлаажуулалтын зөвлөх багийн хурал 6-р сарын 16-18-ны өдөр цахимаар зохион байгуулагдаж байна.

Хуралд бүсийн 37 орны 150 хүн оролцож, 12 улс өөрийн улсын дархлаажуулалтын талаар илтгэл танилцуулаад байна. Манай улс хурлын 2 дахь өдөр "Ковид-19 цар тахлын үед Дархлаажуулалтын тусламж үйлчилгээ" сэдэвт илтгэлээр дархлаажуулалтын үйл ажиллагаа тогтвортой үргэлжилж, вакцин биобэлдмэлийн хангалт тасалдаагүй, вакцины хамралт өндөр байгаа талаар туршлагаа хуваалцжээ.

Бүсийн Лаос, Папуа Шинэ Гвиней зэрэг зарим улсад вакцин тасарсан, дархлаажуулалтын хамралт буурсан байна. Өмнө нь энэхүү хуралд улс бүрээс төлөөлөл болгон 2-3 хүн оролцдог байсан бол энэ жил технологийн дэвшлийг ашиглан Дархлаажуулалтын баг бүрэн бүрэлдэхүүнээрээ оролцох боломж бүрдсэн нь илүү давуу талтай юм.