Улсын Их хурал

Улсын их хурлын дарга Г.Занданшатар сэтгүүлчидтэй цөөн хором уулзаж сонирхсон асуултад хариулт өглөө. Тэрээр өнгөрсөн Мягмар гарагт Хятад улсын 750 гаруй иргэнийг тагнуул, цагдаагийн байгууллага саатуулсан асуудалд анхаарал хандуулж байгаагаа онцоллоо. Мөнгө угаах гэмт хэрэгтэй холбоотой учраас эдгээр иргэдэд хэн виз олгосон, өндөр хурдны компьютер олон тоогоор оруулах зөвшөөрөл хаанаас гарсан гээд нарийн нягтлах учиртайг Улсын их хурлын дарга Г.Занданшатар хэллээ. Шалгалт дууссаны дараа энэ хэрэгт оролцсон бүх хүнд хариуцлага тооцно гэдгийг ч онцолсон байна.

Манай улсын хилээр 800 орчим хятад иргэн өнгөрсөн наймдугаар сараас эхлэн бага багаар нэвтэрч нэр бүхий таван зочид буудалд байрлан цахим орчинд мөнгө угааж байсан хэргийг Тагнуулын байгууллага илрүүлсэн. Улмаар гүйцэтгэх ажиллагаа явуулж өндөр хүчин чадал бүхий 1000 комьютер, 10 мянга орчим гар утас сим картыг хураан аваад байгаа юм. Дээрх хэргийг манай улсын нэг иргэн БНХАУ-ын дөрвөн иргэний хамтаар удирдан зохион байгуулсныг тогтоож хуулийн байгууллага байцаалт аван шалгаж байгаа. Тэгвэл  их хэмжээний компьютер, гар утас хилээр нэвтрүүлж байхад илрүүлж чадаагүй хил гаалийнханд  хамгийн түрүүнд хариуцлага тооцохоо УИХ-ын дарга хэллээ.

Хариуцлага яригдах дараагийн эзэд нь үүрэн холбооны оператор компаниуд болоод зочид буудлууд юм. Ямар ч хяналт, хязгаар тогтоолгүй их хэмжээний сим карт олгосон болоод хятад иргэдийг хэдэн зуугаар нь байршуулсан зочид буудлын эздэд хариуцлага ярих нь зүйтэй.  

Үүнээс гадна аяллын визээр нэвтэрсэн хятад иргэд цахим орчинд мөнгө угаасан асуудал хамгийн том анхаарах зүйл гэдгийг УИХ-ын дарга онцоллоо. Учир нь манай улс олон улсын мөнгө угаах гэмт хэргийн эсрэг тэмцдэг FATF байгууллагын саарал жагсаалтад багтсан гол шалтгаан  мөнгө угаахтай холбоотой юм.

Саарал жагсаалтаас хурдан гарах бүх талын арга хэмжээг УИХ холбогдох байгууллагууд авч ажиллаж байгааг тэрээр онцоллоо.  Харин санхүүгийн зохицуулах хорооны даргад хариуцлага тооцох чиглэлийг УИХ-ын эдийн засгийн байнгын хороонд өгсөн гэнэ.

ФЭЙСБҮҮК ШУУД