Улсын Их хурал

Ирэх 6-р сарын 24-ний өдөр Улсын их хурлын ээлжит сонгуулийг явуулахаар товлоод байна. Сонгуулийн ерөнхий хороо энэ товоос гадна тойргуудад мандат хуваах асуудлыг ч боловсруулж эхэлжээ. Энэ бүхнийг эцсийн байдлаар Улсын их хурал батлах юм. Мөн хуулиар бэлэг сэлт тараахыг хориглосон. Хуулийн энэ заалт ирэх сарын нэгнээс хэрэгжих юм. Өөрөөр хэлбэл 2 сарын 1-ний өдрөөс хойш ийм зөрчил гаргасан бол сонгуульд нэр дэвшүүлэхгүй гэдгийг Сонгуулийн ерөнхий хорооны дарга хэллээ. 

Сонгуулийн жилийн 2-р сарын 1-нээс өмнө сонгууль болох өдрийг товлох ёстой. Энэ дагуу СЕХ-ноос УИХ-ын сонгуулийг 6-р сарын 24-нд, орон нутгийн сонгуулийг 10-р сарын эхээр явуулах тухай саналаа хүргүүлжээ. Мөн СЕХ-ноос тойрог байгуулж, мандат хуваарилах асуудалтай холбоотойгоор хийгдсэн судалгааг хүргүүлсэн байна. Зарим улс төрийн намууд нийслэлийн мандатыг бууруулж, орон нутагт нэмэх тухай яриа өрнөж байгаа. Харин СЕХ-оос хүн амын тоо болон, нутаг дэвсгэрийн хэмжээг тооцож, мандат хуваарилах ёстойг санууллаа.

УИХ-ын гишүүд тэмдэглэлт үйл явдал, баяртай холбоотойгоор тойрогтоо ажиллах улмаар бэлэг тараах байдал гарч байгаа. Энэ нь хууль зөрчсөн үйлдэл гэдгийг СЕХ-ны дарга мэдэгдлээ. Үүнээс гадна урлаг спортын арга хэмжээ зохион байгуулах болон үнэгүй үйлчилгээ явуулах нь хуулиар хориотой.