Архив...

Улсын Их хурал

Сонгуулийн ерөнхий хорооны үйл ажиллагааг 11 жил удирдсан дарга нарыг Улсын их хурал өнөөдөр солилоо. Орон нутаг, Улсын их хурал, ерөнхийлөгчийн сонгуулийг амжилттай зохион байгуулсныг гишүүд онцлон хэллээ. Харин шинээр томилогдож байгаа Сонгуулийн ерөнхий хорооны гишүүдийг өргөсөн тангарагтаа үнэнч байж, сонгуулийг шударгаар зохион байгуулахыг захилаа.

Сонгуулийн ерөнхий хороо есөн гишүүнээс бүрдэж үүрэгт ажлаа хараат бусаар явуулах эрхтэй. Хуульд зааснаар сонгуулийн төв байгууллагын гишүүдээс тавыг УИХ, хоёрыг МУ-ын Ерөнхийлөгч санал болгож УИХ-аар хэлэлцэн томилдог бол Улсын дээд шүүхээс үлдсэн хоёр гишүүнийг нэр дэвшүүлэх эрхтэй байдаг. СЕХ-г 11 жил даргалсан Ч.Содномцэрэн, нарийн бичгийн дарга Ц.Болдсайхан нар тэтгэврийн насанд хүрсэн тул үүрэгт ажлаа хүлээлгэн өгөх хүсэлтээ өгчээ. Мөн хорооны хоёр гишүүн хүндэтгэх шалтгаанаар ажлаас чөлөөлөгдөх хүсэлтээ гаргасныг УИХ-ын чуулганаар хэлэлцлээ. 

СОНГУУЛИЙН ЕРӨНХИЙ ХОРООНЫ УДИРДЛАГЫГ ШИНЭЧИЛЛЭЭ

Сонгуулийн ерөнхий хорооны шинэ гишүүнээр ҮАБЗ-ийн Ажлын албаны дарга Даваанямын Даваа-Очирыг МУ-ын Ерөнхийлөгч санал болгосон. Тэрээр ШШГЕГ-ын сургалтын төвийн захирал, хорих 461-р ангийн дарга зэргээр төрийн албанд 39 дэх шилдээ ажиллаж байгаа туршлагатай юм байна. Харин УИХ-ын төрийн байгууллалтын байнгын хорооноос СЕХ-ны гишүүнээр Ж.Болд, П.Дэлгэрнаран, Э.Түвшинжаргал нарын гурван хүнийг нэр дэвшүүлсэн. Сонгуулийн төв байгууллагын гишүүн нь төрийн албанд олон жил ажилласан туршлагатай төрийн жинхэнэ алба хаагч байх шаардлага тавигддаг. Тус гурван хүн нь хуульд заасан шаардлагад бүрэн нийцсэн тул нэр дэвшүүлсэн гэлээ.

 

Ийнхүү гишүүд асуулт асууж, үг хэлсний дараа санал хураалт явуулж нийт гишүүдийн олонхи Сонгуулийн ерөнхий хорооны шинэ гишүүдийг тохилохыг дэмжлээ. Гишүүдийн зүгээс сонгуулийн төв байгууллага хараат бусаар ажлаа явуулж, сонгогчдын эрх ашгийг хамгаалан ажиллахыг санууллаа.