Улсын Их хурал

Манай улс цар тахлын үед хэрэгжүүлэх хууль баталсан. Хөл хорио, эдийн засгийн дэмжлэгээс эхлээд хөл хорионы үед хэрэгжүүлэх арга хэмжээг зохицуулах юм. Тэгвэл энэ хуулийн төслийн хэрэгжилтийг нягтлах Улсын их хурлын түр хорооны гишүүд солигдлоо. Шинэ гишүүд эхний ээлжинд 21 хоногийн тусгаарлалтыг дахин судлахаар болсон байна.

Энэ сарын 17-ны өдөр Солонгос Улсаас тусгай үүргийн онгоцоор ирсэн жирэмсэн эмэгтэй тусгаарлах байранд байх хугацаандаа хүүхэд нь зулбаж, элэгний хорт хавдартай байсан аав нь нас барсан талаар цахим орчинд тэрээр мэдээлсэн. Гэвч манай улсад мөрдөж байгаа журмын хүрээнд 21 хоног тусгаарлах шаардлагатай тул тус эмэгтэй аавыгаа эцсийн замд нь үдэх боломжгүй болоод байгаа. Энэ мэт хүндрэлтэй асуудал олон байгаагаас гадна улсын эдийн засагт ч тусгаарлалтын хугацаа урт байгаа нь сөргөөр нөлөөлж байгааг УИХ-ын зарим гишүүд хэлж байна.

Дэлхийн улс орнуудад Ковид-19 цар тахлын хоёр дахь давалгаа эхэлж Франц Улс үндэсний хэмжээнд хөл хорио тогтоосон бол Британи Улс хязгаарлалтаа нэмж эхэлсэн. Тэгвэл энэ цаг үед 21 хоногийн тусгаарлалтын хугацааг багасгах нь эрсдэлтэй гэж үзэх хүмүүс цөөнгүй байгаа юм. Өнгөрсөн парламент цар тахлын эсрэг хуулийг баталж хуулийн хэрэгжилтийг хянан шалгах түр хороо байгуулсан. Тэгвэл шинэ парламент өчигдөр түр хорооны гишүүдийг шинэчилсэн юм. Энэ үеэр цар тахлын эсрэг хуулийн хэрэгжилтийг сар бүр дүгнэн хэлэлцэх хэрэгтэйг гишүүд хэллээ.

ЦАР ТАХЛЫН ЭСРЭГ ХУУЛИЙН ХЭРЭГЖИЛТИЙГ ТҮР ХОРООНЫ ГИШҮҮД САР БҮР УИХ-Д ТАЙЛАГНАХААР БОЛЛОО

Цар тахлын эсрэг хуулийн хэрэгжилтийг хянах УИХ-ын түр хороог УИХ-ын гишүүн Б.Баттөмөр ахална. Тус хороо үйл ажиллагаагаа идэвхижүүлж 21 хоногийн тусгаарлалтын хугацааг цаашид хэрхэх болоод хуулийн хэрэгжилтийг хэрхэн хангуулах асуудлыг нэн тэргүүнд судлахыг УИХ-ын дарга үүрэг болгосон юм.

Цар тахлын эсрэг хуулийн хэрэгжилтийг хянан шалгах түр хороонд УИХ-ын гишүүн Х.Болорчулуун, Ж.Мөнхбат, Б.Бат-Эрдэнэ, Н.Учрал, М.Оюунчимэг, Л.Энх-Амгалан, Б.Жавхлан, Б.Чойжилсүрэн, С.Бямбацогт, Ж.Ганбаатар, Б.Бейсен, С.Ганбаатар, Т.Доржханд, Н.Алтанхуяг нарын гишүүд багтаж байна.