Засгийн газар

Парламент 2020 оны улсын төсвийн төслийг хэлэлцэж эхэллээ. Засгийн газар өнгөрсөн жилүүдэд төсвийн сахилга батыг сайжруулж цогц бодлого хэрэгжүүлэн ажилласны дүнд улсын эдийн засаг сэргэж эхлэсэн. Тиймээс манай улс түүхэндээ анх удаа бүтээн байгуулалтад хоёр их наяд орчим төгрөг төсөвлөснөөрөө ирэх оны төсөв онцлог болж байгаа юм байна. Цаашид цахим ил тод төсвийн бодлого хэрэгжүүлэн ажиллана гэдгийг чуулганы индэрээс Ерөнхий сайд онцолж байна. 

2016 онд 1.6 хувьтай байсан эдийн засгийн өсөлт энэ оны эцэс гэхэд 7-8 хувьд хүрэх төлөвтэй байгаа юм. Улсын эдийн засгийн өсөлтийг иргэдийн амьдралд тэгш хүртээх үүднээс цалин тэтгэврийг үе шаттайгаар нэмэгдүүлэх арга хэмжээг засгийн газар авч байгаа. Үүнээс гадна манай улс эрдэс баялгийн салбараас олсон орлогоосоо ирээдүй хойчдоо хөрөнгө өвлүүлэх үүднээс 2017 оноос Ирээдүйн өв сангийн тухай хуулийг батлаж өнөөдрийн байдлаар тус санд 368.2 тэрбум төгрөгийн хуримтлал үүсчээ. Дампуурлаа зарлах хэмжээнд байсан эдийн засгийг өнөөгийн түвшинд хүргэсэн нь төсвийн сахилга батыг сайжруулж, хөрөнгийг үр ашигтай зарцуулсантай холбоотойг засгийн газрын тэргүүн онцоллоо. Засгийн газраас ирэх оны улсын төсвийг Улсын их хуралд өргөн барьж анхны хэлэлцүүлгийг өнөөдөр эхлүүллээ. Ирэх онд цахим ил тод үр ашигтай төсвийн бодлогыг үргэлжлүүлэн хэрэгжүүлнэ гэдгээ Ерөнхий сайд онцолсон юм.

Ирэх онд улсын төсвийн орлого 12.9 их наяд төгрөг байхаар төсөөлсөн бол зарлагыг 13.8 их наяд байхаар тооцсон. Харин эдийн засгийн бодит өсөлтийг 6 хувь байхаар төсөөлж төсвийн алдагдлыг 2 их наяд байхаар тусгасан. Улсын төсвийг хэлэлцэж эхлэсэнтэй холбоотой гишүүд орлого зарлага алдагдлын хэмжээг хэр бодитой төлөвлөснийг тодруулж байсан юм.

Ирэх онд улсын хэмжээнд 58 цэцэрлэг, 83 сургууль, 47 эмнэлэг шинээр барихаар төсөвт тусгасан бол цалин тэтгэвэр тэтгэмжийг инфляцийн түвшинтэй уялдуулан нэмэх юм. Мөн байгалийн түүхийн музей, Чингис хааны музей, Үндэсний урлагийн их театр, Үндэсний төв цэнгэлдэх хүрээлэн зэрэг томоохон бүтээн байгуулалтуудыг хийхээр шаардлагатай хөрөнгийг тусгаад байгаа юм.