Засгийн газар

Энэ жил элсэлтийн ерөнхий шалгалт өгөх 28 мянга гаруй сурагч байна. Тэднийг шалгалтандаа бэлтгэж, хичээлээ давтахад нь зориулж 12-р ангийн бүх хичээл, заавар зөвлөмжийг интернэтэд байрлуулна, мөн CD болгон тараана. Хүүхэд бүр ухаалаг утасгүй бас интернэт ашиглах боломжгүй учраас CD хэлбэрийг давхар сонгосон байна. Ялангуяа малчин өрхийн сурагчдад CD хүргэх нь хамгийн оновчтой байгааг онцоллоо.

Техник технологи өндөр хөгжсөн өнөөгийн нөхцөлд 28 мянган ширхэг CD-нд хичээл хувилан төгсөх ангийн сурагчдад тараана гэх салбарын сайдыг цахим орчинд шүүмжилж эхлэсэн. Гэвч төгсөх ангийн 28 мянган сурагчдын дийлэнх нь хөдөө орон нутаг, алслагдсан сумдууд, малчны хотонд амьдардаг гэдгийг ойлгох хэрэгтэйг Боловсролын сайд онцолж байна. Учир нь өргөн уудам нутагт тархай бутархай оршин суудаг манай улсын тухайд маш хурдан хугацаанд бага төсөв зардлаар бүх хүүхдэд мэдээлэл өгөх боломж үүнээс өөр байхгүйг хэллээ.

Шинэ коронавирусийн халдвар цар тахлын хэмжээнд хүрч дэлхийн улс орнуудын нөхцөл байдал өдрөөс өдөрт хүндэрч байгаа. Ийм цаг үед манай улсын эрүүл мэндийн болоод боловcролын салбар хүндхэн сорилтуудтай тулгарч байна. Тодруулбал бүх төрлийн сургалтын байгууллагыг хааж теле хичээлийг удаан хугацаанд зааж байсан түүх байхгүй. Тиймээс эцэг эхчүүд хүүхдийнхээ хичээлийн бэлтгэлд маш сайн анхаарах хэрэгтэйг салбарын сайд онцлоод боловсролын салбараар улс төржихгүй байхыг хүслээ.

12-р ангиа төгсөж их дээд сургуульд элсэн суралцах хүүхдүүд гуравхан сарын дараа шалгалтаа өгнө. Тодруулбал, элсэлтийн ерөнхий шалгалтыг 07-р сарын 02-ноос 05-ны өдрүүдэд авахаар шийдвэрлэсэн.

Тэгвэл малчны хотонд гэлтгүй нийслэл хотод ч интернет сүлжээтэй компьютер, таблет ашиглах боломжгүй хүүхдүүд байгааг санах хэрэгтэй.

Тиймээс иргэд нөхцөл байдлыг ойлгож, хийж байгаа ажилд нь хүндэтгэлтэй хандахыг хүссэн юм. Учир нь нэг сая хүүхдийн боловсролын асуудлыг орхигдуулахгүй байхад бүхий л чадлаараа ажиллаж байгааг хэллээ.