Засгийн газар

Ирэх долоо хоногоос Улсын их хурал 2021 оны нэгдсэн төсвийн хоёр дахь хэлэлцүүлэг хийнэ. 4 удаа хэлэлцдэг бодлогын баримт бичгийн хоёр дахь хэлэлцүүлгээр хаана ямар хөрөнгө оруулалт хийх, юунд орлогоо зарцуулах гээд бүгд тодорхой болох юм. Тэгвэл зураг төсөл нь бэлэн болсон, аудит дээр асуудал үүсээгүй бүтээн байгуулалтад хөрөнгө оруулалт хийнэ. Бусад зардлыг бүгдийг нь танах чиглэлтэй байгааг гишүүд хэллээ.

УИХ 2021 оны улсын нэгдсэн төсвийн хоёрдугаар хэлэлцүүлгийг ирэх долоо хоногт эхлүүлэхээр төлөвлөөд байна. Ирэх оны улсын төсөв халамжийг хавтгайруулсан, хөрөнгө оруулалтыг харилцан адилгүй хийсэн, цар тахлын эрсдэлт нөхцөлд шаардлагагүй барилга байгууламжид их хэмжээний мөнгө төсөвлөсөн гэх шүүмжлэлийг хүртээд байгаа. Тэгвэл дэлхийн бусад оронтой харьцуулахад манай улсад халамж хавтгайраагүй хэмээн зарим гишүүд хэлж байна. Гэхдээ ирэх оны эхний хагас хүртэл хүүхдийн мөнгийг 100 мянган төгрөгөөр олгохоор болсон нь халамжид зарцуулах төсвийн хөрөнгийг өндөр харагдуулж байгааг хэллээ.

ХҮҮХДИЙН МӨНГИЙГ 100 МЯНГАН ТӨГРӨГ БОЛГОСОН НЬ ИРЭХ ОНЫ ТӨСӨВТ ХАЛАМЖ ХАВТГАЙРСАН МЭТ ХАРАГДУУЛЖ БАЙНА

2021 онд улсын төсвөөс хийгдэх хөрөнгө оруулалтуудаас хамгийн өндөр зардал буюу 60.2 тэрбум төгрөгийг Хэнтий аймагт хувиарласан. Нийтдээ 38 шинэ ажлыг хийхэд эхний ээлжинд 29.5 тэрбум төгрөг шаардлагатай гэж үзэж байгаа юм. Төсвөөс хамгийн их хөрөнгө оруулалт авч байгаа аймгуудыг Дундговь аймаг удаалж байна. Тус аймагт ирэх онд 15 арга хэмжээнд 57.5 тэрбум төгрөг төсөвлөжээ. Энэ мэтээр ирэх оны төсөвт хөрөнгө оруулалтын хэмжээг харилцан адилгүй тусгасан гэдгийг зарим гишүүд ч хэлж байна. Тэр дундаа улсын хүн амын тэн хагас нь амьдарч байгаа нийслэл хот хоёр аймгийн төсөвтэй тэнцэх хэмжээнд санхүүжилт авах юм.

ЗУРАГ ТӨСӨВ НЬ БҮРЭН ХИЙГДЭЭГҮЙ ТӨСЛҮҮДИЙГ ТӨСВИЙН ХӨРӨНГӨ ОРУУЛАЛТААС ХАСНА

Нийслэлийн дүүргүүдээс Баянзүрх, Чингэлтэй дүүргүүдэд арай өндөр хөрөнгө оруулалт хийгдэнэ. Тодруулбал, Баянзүрх дүүрэгт 26 ажилд шаардлагатай 53.5 тэрбум төгрөгөөс 2021 онд 13 тэрбум төгрөгийн санхүүжилт хийнэ гэж байгаа. Харин Чингэлтэй дүүрэгт 13 ажилд шаардлагатай 30.6 тэрбум төгрөгөөс ирэх онд 16.4 тэрбум төгрөгийн санхүүжилт хийхээр байгаа юм. Харин хүн ам ихтэй Сонгинохайрхан дүүрэгт ирэх онд 8 тэрбум төгрөгийн санхүүжилт тавигджээ. Тэгвэл Багануур, Налайх дүүргүүд хамгийн бага хөрөнгө оруулалт буюу тус бүр 1.6 тэрбум төгрөгийн санхүүжилт авахаар байгаа юм. Цаашид улсын төсвөөс хийгдэх хөрөнгө оруулалтуудыг эрэмбэлэх хэрэгтэйг гишүүд хэлж байна. Мөн зураг төсөв нь бүрэн хийгдээгүй төслүүдийг хасах нь зүйтэйг онцоллоо.

Үндсэн хуулийн шинэчлэлийн хүрээнд ирэх оны улсын төсөвт гишүүд тойрогтоо хөрөнгө оруулалт нэмэх замаар зарлага нэмэх боломжгүй. Үүнээс гадна ирэх оны улсын төсөвт эрүүл мэндийн салбарт томоохон хөрөнгө оруулалт хийхээр тусгасан. Хагас их наяд орчим төгрөгийн санхүүжилт эрүүл мэндийн салбарт хийгдэх нь ирэх оны төсвийн бас нэг онцлог гэдгийг гишүүд хэллээ.