Намууд

Ардчилсан намын зөвлөл өнөөдөр гурван асуудлаар хуралдлаа.  Тэд 2020 оны төсвийг хэт хөөсрөлттэй болсон гэж шүүмжилж байна.  Учир нь гишүүд сонгуулийн жилтэй уялдуулж өөрсдийн мөрийн хөтөлбөртөө тааруулсан төсөв хийсэн нь алдаа дутагдалтай байгааг шүүмжиллээ. Мөн Монгол улс саарал жагсаалтад багтсан хэрэгт ХЗДХ-ийн сайд Нямдоржийг хариуцлага хүлээх ёстой гэж үзэж байна.  Мөн Үндсэн хуулийн нэмэлт өөрчлөлтийн төсөл дээр АН дэвшүүлсэн гурван санал дээрээ байр суурь ганхахгүй гэж мэдэгдлээ. 

Засгийн газар ирэх оны төсвийг УИХ-д өргөн барихдаа орлогыг 12.9 их наяд байхаар тооцож зарлагыг 13.8 их наяд байхаар тусгасан. Харин засгийн газраас өргөн барьсан төсвийг сонгуулийн жилд тааруулан хэт өөдрөгөөр төсөөлсөн гэж УИХ дахь Ардчилсан намын зөвлөл үзлээ. Мөн Үндэсний урлагийн их театр, Чингис хааны музей зэрэг томоохон бүтээн байгуулалтуудыг нэг жилийн дотор барьж дуусах нь эргэлзээтэй тул ашиггүй хөрөнгө оруулалтуудыг хасах хэрэгтэй гэдэг байр суурийг илэрхийлсэн юм.

Зарим гишүүдийн зүгээс ирэх оны төсвийг харьцангуй бодит төсөв болсон гэж үзэж байгаа. Учир нь жил бүр төсвөө алдагдалтай батладаг манай улсын тухайд 2016 оны сонгуулийн дараах төсвийн алдагдал 18 хувьд хүрч байсантай харьцуулахад 2020 оны төсвийн алдагдлыг 5.1 хувьтай тусгасан нь засгийн газрын бодлого төсвийн сахилга баттай холбоотой гэж үзэх гишүүд байгаа юм. Харин Ардчилсан намын зүгээс эрх баригч намын мөрийн хөтөлбөрт таарсан төсөв болсон гэж үзэж байгаагаа илэрхийллээ. Мөн тус намын зөвлөл саарал жагсаалттай холбоотой Хууль зүйн сайд хариуцлага хүлээх шаардлагатай гэлээ.

Ардчилсан намын зөвлөл өнөөдрийн хуралдаанаараа Үндсэн хуулийн нэмэлт өөрчлөлттэй холбоотой асуудлыг хэлэлцсэн гэнэ. Тус нам ерөнхийлөгчийг УИХ-аас томилох, Ерөнхий сайд танхимаа өөрөө бүрдүүлэх, сонгуулийг холимог тогтолцоогоор явуулах гэсэн гурван заалтыг үндсэн хуульд тусгахыг шаардаж байгаа. Энэ байр сууриндаа хатуу зогсоно гэдэгээ хэллээ.