Халуун сэдэв

Зориг агсны амь насыг хөнөөсөн хэргийн шийдвэрлэсэн байдлыг шалгах улсын их хурлын түр хороонд олон улсын парламентын холбоо дүгнэлтээ илгээжээ. Сар гаруйн өмнө явуулсан дүгнэлт төрийн нууцад багтсан байсныг ил болгож байгааг гишүүд онцоллоо. Олон улсын шинжээчид ял авсан иргэдийг түр суллаж, энэ хэргийг төрийн нууцаас бүрэн гаргах ёстой гэж үзсэн байна. Нууц задруулсныхаа төлөө гишүүд хариуцлага хүлээхэд бэлэн гэдгээ ч хэллээ. 

С.Зориг агсныг хөнөөсөн хэрэгт ял авсан Содномдаржаа, Чимгээ нарыг хүчээр эрүүдэн шүүж хэрэг хүлээлгэсэн асуудал шүүхээр эцэслэгдээгүй өнөөдрийг хүрсэн. Тэгвэл энэ асуудлаар ОУПХ манай улсад ажилласан дүгнэлтээ өнгөрсөн 9-р сард илгээсэн гэнэ. Гэвч тус дүгнэлтийг УИХ-ын гадаад харилцааны хэлтэс авч түр хорооны гишүүдэд өгөлгүй нуусан гэж УИХ-ын гишүүн Батзандан мэдээллээ. Эрүүдэн шүүсэн хэрэгт хяналт тавих үүрэгтэйгээр байгуулагдсан түр хорооны гишүүдээс дүгнэлтийг нуугаад зогсохгүй тэдэнд хаягласан захидлыг замаас нь авч нууцын тамга дарсан байсныг ил болгож байгаагаа мэдэгдлээ.

Олон улсын парламентын хорооны хүний эрхийн хорооноос илгээсэн дүгнэлтэд Содномдаржаа, Чимгээ нар эрүүдэн шүүгдсэн нь бичлэгээр нотлогдож хүчээр хэрэг үүрсэн нь ил болсон байтал Монгол улсын шүүх өнөөдрийг хүртэл суллахгүй байгааг гайхаж байна гэжээ. Тиймээс тэднийг нэн даруй суллахад анхаарал хандуулж ажиллах хэрэгтэй гэж зөвлөсөн байна. Мөн олон улсын хүний эрхийн хорооны төлөөллүүд Амгаланбаатартай уулзахад түүний өрөөнд хуулийн байгууллагын ажилтанг хамт байлгаж хэрэг хүлээхээс гадна Содномдаржаа, Чимгээ нарыг Зориг агсныг хөнөөсөн гэж гүтгэхийг шаардсан гэжээ. Харин улсын нууцад багтсан хэргийг ил болгож байгаа тул хариуцлагаа хүлээхэд бэлэн гэж түр хорооны гишүүд мэдэгдсэн юм.

Үүнээс гадна С.Зориг агсныг хөнөөсөн хэргийн захиалагч одоог хүртэл илрэхгүй байгаа нь хэргийг нууцаас гаргахгүй байгаатай холбоотой гэж олон улсын парламентын холбоо үзжээ. Хэргийг нууцаас гаргасан шүүхийн шийдвэрийг ОУПХ-нд өгөх амлалтаа Монгол улсын хууль хяналтын байгууллага одоо хүртэл биелүүлэхгүй байгааг мөн анхааруулсан байна.