Нийгэм

Нийслэлийн хэмжээнд сайжруулсан шахмал түлшийг хэрэглээнд нэвтрүүлсэнтэй холбоотой өндөржүүлсэн бэлэн байдалд ажиллаж 24 цагаар шуурхай штаб хөдөлгөөнт эргүүлүүд ажилласаар байна. Гэвч өнгөрсөн амралтын өдрүүдэд 15 өрхийн 50 орчим иргэн угаарийн хийнд хөнгөн хордож зөвөлгөө эмчилгээ авсан байна. Харамсалтай нь 21-ний өдөр нийслэлийн Баянзүрх дүүрийн 19-р хороо Цайз захын орчинд 60 настай эмэгтэй угаартаж нас барсан байна.

14 хоногийн дараа шүүх эмнэлгийн дүгнэлт гарах бол урьдчилсан байдлаар яндангийн залгаагаа буруу холбож хаалтаа бүрэн хаасны улмаас угаартсан гэж гарчээ. Тиймээс иргэд угаарийн хийн мэдрэгчээ унтраахгүй байх, пийшин зуух, яндангийн бүрэн бүтэн байдлыг сайтар хангахад анхаарах хэрэгтэйг албаны хүмүүс хэлж байна. Урин цаг ирж байгаа ч угаарын хордлогоос сэргийлэх хэрэгтэйг санууллаа. Сайжруулсан түлш хэрэглэдэг орнуудад ч угаартах тохиолдол их байдаг тул иргэд аюулгүй байдалдаа онцгой анхаарахыг санууллаа.