Нийгэм

600 мянга хүн амын ахуйн бохир усыг цэвэрлэх төв цэвэрлэх байгууламж байгуулагдаад 56 жил болж байна. Хүн ам, үйлдвэрлэл нэмэгдэхийн хэрээр төв цэвэрлэх байгууламж ачааллаа дийлэхээ больж, шинэ төв цэвэрлэх байгууламж барих шаардлагатай байгааг 2012 оноос яригдаж эхэлсэн. Олон жил яригдсан шинэ төв цэвэрлэх байгууламжийн ажил өнгөрөгч оноос эхлэн бодит ажил болсон.

Гэвч дэлхий даяар цар тахал гарснаас болж барилгын ажил удаашрахад хүрээд байна. Гэсэн ч Барилга, хот байгуулалтын яамнаас төлөвлөсөн хугацаандаа буюу 2023 онд барилгын ажлыг дуусгана гэлээ.

БНХАУ-ын Засгийн газрын хөнгөлөлттэй зээлийн хүрээнд хэрэгжиж буй “Улаанбаатар хотын төв цэвэрлэх байгууламж” нь Сонгинохайрхан дүүрэгт байрлах хуучин байгууламжийн хажууд баригдаж байгаа. Төв Цэвэрлэх байгууламж нь нийт 40 га талбайд баригдах бөгөөд нийт талбайн 24.7 га талбай буюу 62 хувьд нь төслийг хэрэгжүүлэхэд шаардлагатай барилга байгууламжийг барина. Үүнээс гадна авто зам, явган хүний зам талбай, ногоон байгууламжийг байгуулахаар төлөвлөжээ.

Шинээр баригдаж байгаа Төв цэвэрлэх байгууламж нь 250 мянган метр куб лагийг цэвэрлэх хүчин чадалтай. Төв цэвэрлэх байгууламжийг 300 сая ам.долларын өртгөөр барьж байгаа. Санхүүжилтийг БНХАУ-ын нэн хөнгөлөлттэй, 20 жилийн хугацаатай зээлээр бүрдүүлсэн. Энэхүү зээл нь жилийн 2 хувийн хүүтэй, эхний 7 жил хүүгүй байх нөхцөлтэй юм.